இன்று முதல் தொடங்கும் ஆஸ்திரேலியா - இங்கிலாந்து டி20 தொடர்

இரு பலம் பொருந்திய அணிகளான ஆஸ்திரேலியாவும் இங்கிலாந்தும் இன்று முதல் தொடங்கும் டி20 தொடரில் மோதுகின்றன.

மேற்கிந்தியத் தீவுகள் அணிக்கு எதிரான டெஸ்ட் தொடரை 2-1 என வென்றது இங்கிலாந்து அணி. அடுத்ததாக பாகிஸ்தானுக்கு எதிரான டெஸ்ட் தொடரில் விளையாடியது டெஸ்ட் தொடரை 1-0 என வென்றது. பாகிஸ்தானுக்கு எதிரான டி20 தொடரை 1-1 என சமன் செய்தது. 

இதற்கடுத்து இங்கிலாந்து - ஆஸ்திரேலியா அணிகள் ஒருநாள், டி20 தொடர்களில் விளையாடுகின்றன. டி20 தொடர் செளதாம்ப்டனிலும் ஒருநாள் தொடர் மான்செஸ்டரிலும் நடைபெறவுள்ளன. டி20 தொடர் இன்று முதல் தொடங்குகிறது. செப்டம்பர் 4, 6, 8 தேதிகளில் டி20 தொடரும் செப்டம்பர் 11, 13, 16 தேதிகளில் ஒருநாள் தொடரும் நடைபெறவுள்ளன. ஒருநாள் தொடர் உலகக் கோப்பை சூப்பர் லீக்கில் இடம்பெறும் என்றும் அறிவிக்கப்பட்டுள்ளது. 

ஸ்மித், ஆரோன் ஃபிஞ்ச், வார்னர், மேக்ஸ்வெல், ஸ்டார்க், கம்மின்ஸ், ஸம்பா, அகர் என திறமையான வீரர்களைக் கொண்டு களமிறங்குகிறது ஆஸ்திரேலிய அணி.  

இங்கிலாந்து அணியில் ஜாஸ் பட்லர் - பேர்ஸ்டோவ் தொடக்க வீரர்களாகக் களமிறங்கவுள்ளார்கள். மொயீன் அலி மீண்டும் சிறப்பாக விளையாடுவது அணிக்குக் கூடுதல் பலத்தைத் தருகிறது.

2005 முதல் இரு அணிகளும் டி20யில் 16 முறை மோதியுள்ளன. இதில் ஆஸ்திரேலிய அணி 9 ஆட்டங்களில் வென்று ஆதிக்கம் செலுத்துகிறது.

மழை ஆபத்து இல்லாததால் இரு அணிகளும் டி20 தொடரை வெற்றியுடன் தொடங்கப் போராடும் என எதிர்பார்க்கப்படுகிறது.

இந்திய நேரம் இரவு 10.30 இன்றைய ஆட்டம் தொடங்குகிறது. சோனி டிவியில் ஒளிபரப்பாகிறது.