முதல் ஒருநாள்: இலங்கை அணியை வீழ்த்தியது வங்கதேசம்!

இலங்கைக்கு எதிரான முதல் ஒருநாள் ஆட்டத்தில் 33 ரன்கள் வித்தியாசத்தில் வென்றுள்ளது வங்கதேச அணி.

டாக்காவில் நடைபெற்ற ஆட்டத்தில் டாஸ் வென்ற வங்கதேச அணி முதலில் பேட்டிங் செய்தது. அந்த அணி 50 ஓவர்களில் 6 விக்கெட் இழப்புக்கு 257 ரன்கள் எடுத்தது. கேப்டன் தமிம் இக்பால் 52 ரன்களும் விக்கெட் கீப்பர் முஷ்ஃபிகுர் ரஹிம் 84 ரன்களும் மஹ்முதுல்லா 54 ரன்களும் எடுத்தார்கள். இலங்கை அணித் தரப்பில் தனஞ்ஜெயா 3 விக்கெட்டுகளை வீழ்த்தினார்.

இந்த இலக்கை இலங்கை அணி எளிதாக அடைந்துவிடும் என எதிர்பார்க்கப்பட்டது. ஆனால் 48.1 ஓவர்களில் 224 ரன்களுக்கு அனைத்து விக்கெட்டுகளையும் இழந்து தோல்வியடைந்தது. வங்கதேச அணித் தரப்பில் மெஹிடி ஹசன் மிராஸ் 4 விக்கெட்டுகளையும் முஸ்தாஃபிசுர் ரஹ்மான் 3 விக்கெட்டுகளையும் வீழ்த்தி அணியின் வெற்றிக்கு உதவினார்கள். 

2-வது ஒருநாள் ஆட்டம் நாளை நடைபெறவுள்ளது.