இன்று விளையாடும் ரொனால்டோ, நெய்மர்

இன்று நடைபெறும் உலகக் கோப்பைப் போட்டியில் பிரேசில், போர்ச்சுகள் அணிகள் விளையாடுகின்றன.

கத்தாரில் 22-வது உலகக் கோப்பை கால்பந்து போட்டி ஞாயிற்றுக்கிழமை கோலாகலமாகத் தொடங்கியது. 5-வது நாளன்று 4 ஆட்டங்கள் நடைபெறவுள்ளன. முதல் ஆட்டத்தில் ஸ்விட்சர்லாந்து - கேம்ரூன் அணிகள் மோதுகின்றன. அடுத்த ஆட்டங்களில் உருகுவே - தென் கொரியா, போர்ச்சுகல் - கானா, பிரேசில் - செர்பியா ஆகிய அணிகள் மோதுகின்றன. 

இதுவரை நடைபெற்ற ஆட்டங்களில் ஆர்ஜென்டீனா, ஜெர்மனி ஆகிய பெரிய அணிகள் தோல்வியடைந்துள்ளதால் பிரேசில், போர்ச்சுகள் அணிகளின் ஆட்டங்களை ரசிகர்கள் ஆவலுடன் எதிர்பார்க்கிறார்கள். ஆசியாவில் கடைசியாக உலகக் கோப்பை நடைபெற்றபோது பிரேசில் அணி கோப்பையை வென்றது. தரவரிசையில் முதல் இடத்தில் உள்ளது. இந்த உலகக் கோப்பையில் தரமான அணி பிரேசில் தான் என்கிற பெயரையும் பெற்றுள்ளது. 

இன்றைய ஆட்டங்களில் பிரபல வீரர்களான பிரேசிலின் நெய்மர், போர்ச்சுகலின் ரொனால்டோ ஆகியோரின் பங்களிப்பு அதிகக் கவனத்தை ஈர்க்கவுள்ளன. தனது கடைசி உலகக் கோப்பையில் 37 வயது ரொனால்டோ விளையாடவுள்ளார். மான்செஸ்டர் யுனைடெட் அணியிலிருந்து விலகிய ரொனால்டோ இந்தப் போட்டியில் கவனச்சிதறல் இல்லாமல் விளையாட வேண்டும், கடைசி உலகக் கோப்பையிலாவது அவர் உலகக் கோப்பையைக் கையில் ஏந்த வேண்டும் என்பதே ரசிகர்களின் விருப்பம். 2006-க்குப் பிறகு உலகக் கோப்பை காலிறுதியில் போர்ச்சுகல் தகுதி பெறவில்லை. 

உலகக் கோப்பை: 4-ம் நாள் ஆட்டங்களின் ஹைலைட்ஸ் விடியோ

உலகக் கோப்பை: மைதானத்தைச் சுத்தம் செய்யும் ஜப்பான் ரசிகர்கள்