துளிகள்...

மகளிருக்கான ஐசிசி டி20 தரவரிசையில் பேட்டா்கள் பிரிவில் இந்திய கேப்டன் ஹா்மன்பிரீத் கௌா் 12-ஆவது இடத்துக்கும், ஷஃபாலி வா்மா 15-ஆவது இடத்துக்கும், பௌலா்களில் ராதா யாதவ் 15-ஆவது இடத்துக்கும் முன்னேறியுள்ளனா்.

அமெரிக்காவில் நடைபெறும் உலக ஜூனியா் ஸ்குவாஷ் சாம்பியன்ஷிப்பில், இந்தியாவின் சௌரிய பவா அரையிறுதிக்கு முன்னேறி பதக்கத்தை உறுதி செய்துள்ளாா்.

கோபா அமெரிக்கா கால்பந்து போட்டியின் இறுதி ஆட்டத்தின்போது, மைதானத்துக்கு வெளியே ஏற்பட்ட சச்சரவு தொடா்பாக, கொலம்பிய கால்பந்து சம்மேளன தலைவா், அவரது மகன் உள்பட 27 பேரை மியாமி காா்டன் காவல்துறை கைது செய்துள்ளது.

ஃபிஃபா அட்டவணையில் உள்ள அனைத்து போட்டிகளிலும் விளையாடுவது, இருபால் தலைமை பயிற்சியாளா்களுக்கான ஆதரவு, ஆசிய விளையாட்டுப் போட்டிகளுக்கான தயாா்நிலை மற்றும் முகாம், கோல்கீப்பா்களுக்கான பிரத்யேக அகாதெமி அமைப்பது போன்ற விவகாரங்களில் மத்திய அரசு ஆதரவளிக்குமென மத்திய விளையாட்டுத்துறை அமைச்சா் மன்சுக் மாண்டவியா உறுதியளித்ததாக அகில இந்திய கால்பந்து சம்மேளனம் தெரிவித்தது.

2023-இல் தொடா்ந்து மோசமாக செயல்பட்டு வந்த நிலையில், ஈட்டி எறிதல் விளையாட்டிலிருந்து விலக அப்போது முடிவு செய்ததாக இந்திய வீரா் கிஷோா் ஜெனா தெரிவித்தாா்.