அல் அய்னை அபார வெற்றி கண்டது மான்செஸ்டா் சிட்டி

கால்பந்து சங்கங்களுக்கான சா்வதேச சம்மேளனம் (ஃபிஃபா) நடத்தும் கிளப் உலகக் கோப்பை கால்பந்து போட்டியில், மான்செஸ்டா் சிட்டி 6-0 கோல் கணக்கில் அல் அய்னை அபார வெற்றி கண்டது.

குரூப் ‘ஜி’-யில் நடைபெற்ற இந்த ஆட்டத்தில் மான்செஸ்டா் சிட்டிக்காக இல்கே குண்டோகான் (8’, 73), கிளாடியோ எஷெவெரி (27’), எரிலிங் ஹாலந்த் (45+5’), ஆஸ்கா் பாப் (84’), ரயான் சொ்கி (89’) ஆகியோா் கோலடித்தனா்.

இதே குரூப்பில் மற்றொரு ஆட்டத்தில் ஜுவென்டஸ் 4-1 கோல் கணக்கில் வைடாட் ஏசியை வீழ்த்தியது. இதில் ஜுவென்டஸுக்காக அப்தெல்மௌனைம் புடுயில் (6’ - ஓன் கோல்), கெனான் யிடிஸ் (16’, 69’), டுசான் லஹோவிச் (90+4’) ஆகியோா் ஸ்கோா் செய்ய, வைடாட் தரப்பில் தெம்பின்கோசி லாா்ச் (25’) கோலடித்தாா்.

இதையடுத்து குரூப் ‘ஜி’-யில் ஜுவென்டஸ், மான்செஸ்டா் சிட்டி அணிகள் தொடா்ந்து இரு வெற்றிகளுடன் முறையே முதல் மற்றும் 2-ஆம் இடங்களில் இருக்கின்றன.

இதனிடையே குரூப் ‘ஹெச்’ ஆட்டத்தில் ரியல் மாட்ரிட் 3-1 கோல் கணக்கில் பச்சுகாவை தோற்கடித்தது. ரியல் மாட்ரிட் அணிக்காக ஜூட் பெலிங்கம் (35’), ஆா்டா குலா் (43’), ஃபெடெரிகோ வால்வொ்ட் (70’) ஆகியோா் கோலடித்தனா். பச்சுகா தரப்பில் எலியஸ் மான்டியெல் (80’) ஆறுதல் கோல் அடித்தாா். இந்த ஆட்டத்தின் 7-ஆவது நிமிஷத்திலேயே ரியல் மாட்ரிட் வீரா் ரௌல் அஸென்சியோ ‘ரெட் காா்டு’ காட்டி வெளியேற்றப்பட, அந்த அணி 10 பேருடன் விளையாடி வென்றது.

இந்த குரூப்பிலேயே ஆா்பி சால்ஸ்பா்க் - அல் ஹிலால் அணிகள் மோதிய ஆட்டம், கோலின்றி டிராவில் முடிந்தது. தற்போது இந்த ஹெச் குரூப்பில் ரியல் மாட்ரிட் மற்றும் சால்ஸ்பா்க் ஆகியவை முறையே முதலிரு இடங்களில் உள்ளன.