திருச்சியில் இடி- மின்னலுடன் கொட்டித் தீர்த்த பலத்த மழை

அக்னி நட்சத்திரம் காரணமாக திருச்சியில் 100 டிகிரிக்கு மேல் வெயில் பதிவான நிலையில், புதன்கிழமை மாலை சுமார் ஒன்றரை மணி நேரத்துக்கும் மேலாக இடி மின்னலுடன் பலத்த மழை பெய்தது. 
சித்திரை மாதம் தொடங்கும் முன்னரே திருச்சியில் வெயிலின் தாக்கம் அதிகமாகக் காணப்பட்டு வந்தது. இந்நிலையில், அக்னி நட்சத்திரம் மே 4 ஆம் தேதி தொடங்கிய நிலையில், வெயிலின் அளவும் படிப்படியாக அதிகரித்து காணப்பட்டது. குறிப்பாக, கடந்த திங்கள்கிழமை அதிகபட்சமாக திருச்சியில் 104 டிகிரி அளவில் வெயில் பதிவானது. 
இந்நிலையில், திருச்சியில் புதன்கிழமை மாலை 4 மணிக்கு மேல் இடி, மின்னல், பலத்த காற்றுடன் மழை கொட்டித் தீர்த்தது. இந்த மழை சுமார் 2 மணி நேரத்துக்கு மேலாக பெய்தது. 
மாநகரில்...: உறையூர், சீனிவாசநகர், அம்மையப்ப நகர், குமரன்நகர், ராமலிங்கநகர் விரிவாக்கப் பகுதிகள், புத்தூர், குழுமணி சாலை, சாலை ரோடு, திருச்சி- சென்னை தேசிய நெடுஞ்சாலைப் பகுதிகள், செந்தண்ணீர்புரம், சுப்பிரமணியபுரம், விமான நிலையம், குண்டூர், மார்க்கெட், மரக்கடை, சத்திரம் பேருந்து நிலையம், ஸ்ரீரங்கம் உள்ளிட்ட பல்வேறு பகுதிகளில் ஒன்றரை மணி நேரத்துக்கும் மேலாக மழை கொட்டித் தீர்த்தது.இதனால் மாநகரில் தாழ்வானப் பகுதிகளில் மழைநீர் தேங்கி நின்றது.
சுரங்கப்பாலத்தில் சிக்கிய பேருந்து: மழை பெய்து கொண்டிருந்த நிலையில், சத்திரம் பேருந்து நிலையத்திலிருந்து எரங்குடி நோக்கிச் சென்ற அரசுப் பேருந்தை அதன் ஓட்டுநர் மேலப்புதூர் சுரங்கப்பாலம் வழியாக ஓட்டிச் சென்றார். அப்போது அப்பகுதியில் தண்ணீர் அதிகளவு தேங்கி நின்றதால் பேருந்தை இயக்க முடியவில்லை. பேருந்தில் இருந்த பயணிகள் பத்திரமாக இறங்கி நடந்து சென்றனர்.
இதுகுறித்து தகவலறிந்த போலீஸார் பாலத்தின் இருபகுதிகளிலும் தடுப்புகள் அமைத்து வாகனங்கள் செல்ல தடை விதித்தனர். மழைநீர் படிப்படியாக வடிந்த பின்னர் மீட்பு வாகனம் மூலம் பேருந்து மீட்கப்படும் என்பதால், போலீஸார் அங்கு பணியில் ஈடுபடுத்தப்பட்டனர்.