தலைமை ஆசிரியை கண்டித்ததால் பிளஸ் 2 மாணவிகள் மூவர் தற்கொலை முயற்சி

திருவண்ணாமலை மாவட்டம், ஜவ்வாதுமலை அருகே சிறப்பு வகுப்புக்கு வராததை தலைமை ஆசிரியை கண்டித்ததால், விஷ விதையை சாப்பிட்டு பிளஸ் 2 மாணவிகள் மூவர் புதன்கிழமை தற்கொலைக்கு முயன்றனர்.
ஜவ்வாதுமலை ஒன்றியம்,  ஜமுனாமரத்தூர் வட்டத்திலுள்ள குனிகாந்தூரில் ஜவ்வாது மலைவாழ் மக்கள் மேல்நிலைப் பள்ளி (எஸ்எப்ஆர்டீ) செயல்பட்டு வருகிறது. உண்டுஉறைவிடப் பள்ளியான இந்தப் பள்ளியில் ஜவ்வாதுமலை ஒன்றியத்தில் உள்ள 11 ஊராட்சிகளில் இருந்து முதல் வகுப்பு முதல் பிளஸ் 2 வரை 1,402 மலைவாழ் மாணவ, மாணவிகள் கல்வி பயில்கின்றனர்.
555 மாணவ, மாணவிகள் விடுதியில் தங்கியும், 847 பேர் தினசரி தங்களது வீடுகளிலிருந்து வந்தும் படிக்கின்றனர். இந்தப் பள்ளியில் எஸ்எஸ்எல்சி, பிளஸ் 2 மாணவ, மாணவிகளுக்கு காலை, மாலை வேளைகளில் சிறப்பு வகுப்புகள் நடைபெறுகின்றன.
இந்தப் பள்ளியில் பிளஸ் 2 பயிலும் வெள்ளிகொட்டாய் கிராமத்தைச் சேர்ந்த திருமால் மகள் காவியா, ஏரிமாமரத்தூர் கிராமத்தைச் சேர்ந்த சுப்பிரமணி மகள் சிந்து, ஜமுனாமரத்தூர் கிராமத்தைச் சேர்ந்த காசி மகள் ராஜகுமாரி ஆகியோர் செவ்வாய்க்கிழமை காலையில் நடைபெற்ற சிறப்பு வகுப்புக்கு வரவில்லை எனத் தெரிகிறது. தொடர்ந்து, புதன்கிழமை காலையில் சிறப்பு வகுப்புக்கு வந்த இந்த 3 மாணவிகளையும் பள்ளித் தலைமை ஆசிரியை சில்வியா கண்டித்தாராம்.
சிறப்பு வகுப்பு முடிந்து வீட்டுக்குச் சென்ற மாணவிகள் மூவரும் விஷ விதையை சாப்பிட்டுவிட்டு மீண்டும் பள்ளிக்கு வந்தனராம். இந்த நிலையில், காலை 11 மணியளவில் வகுப்பறையில் 3 மாணவிகளும் மயங்கி விழுந்தனர்.
இதையடுத்து, ஜமுனாமரத்தூரில் உள்ள தனியார் மருத்துவமனையில் மாணவிகளை சிகிச்சைக்காக பள்ளி நிர்வாகத்தினர் அனுமதித்தனர். பின்னர், தீவிரச் சிகிச்சைக்காக வேலூர் மாவட்டம், வாணியம்பாடி அரசு மருத்துவமனைக்கு மாணவிகள் கொண்டு செல்லப்பட்டனர். இதுகுறித்து ஜமுனாமரத்தூர் போலீஸார் வழக்குப் பதிந்து விசாரணை மேற்கொண்டுள்ளனர்.