மாணவருக்கு மாற்றுச் சான்றிதழ்: மருத்துவ கல்லூரிக்கு உத்தரவு

மருத்துவப் படிப்பைப் பாதியிலேயே நிறுத்திய மாணவருக்கு மாற்றுச்சான்றிதழ் உள்ளிட்ட சான்றிதழ்களை வழங்க, சென்னை உயர் நீதிமன்றம் உத்தரவிட்டுள்ளது.
இதுதொடர்பாக கபில்தேவ் என்பவர் உயர் நீதிமன்றத்தில் தாக்கல் செய்த மனுவில், கடந்த 2016-17-ஆம் கல்வியாண்டில் கன்னியாகுமரி மாவட்டம் திருவட்டாரில் உள்ள தனியார் கல்லூரியில் ஹோமியோபதி மருத்துவப் படிப்பில் சேர்ந்தேன். இதற்காக கல்விக் கட்டணம் மற்றும் நன்கொடையாக ரூ.2 லட்சத்து 40 ஆயிரம் செலுத்தினேன். முதலாம் ஆண்டு முடிவடைந்த நிலையில், கல்லூரிக் கட்டணம் செலுத்த முடியாத காரணம் மற்றும் எனது உடல்நிலையின் காரணமாக மருத்துவப் படிப்பைத் தொடர முடியவில்லை. இதனால் எனது மாற்றுச் சான்றிதழை வழங்க வேண்டும் என முதல்வரிடம் கோரினேன்.
மாற்றுச்சான்றிதழை வழங்க மறுப்புத் தெரிவித்த கல்லூரி நிர்வாகம், மருத்துவப் படிப்புக்கான முழுத் தொகையைக் கட்டினால் மட்டுமே சான்றிதழ்களை வழங்க முடியும் எனத் தெரிவித்துவிட்டது. இதுதொடர்பாக மாவட்ட ஆட்சியரிடம் மனு அளித்தேன். அந்த மனு மீது இதுவரை எவ்வித நடவடிக்கையும் எடுக்கவில்லை. எனவே எனது மாற்றுச் சான்றிதழை வழங்க கல்லூரி நிர்வாகத்துக்கு உத்தரவிட வேண்டும்' எனக் கோரியிருந்தார்.
இந்த மனு நீதிபதி வி.பாரதிதாசன் முன் விசாரணைக்கு வந்தது. வழக்கை விசாரித்த நீதிபதி பிறப்பித்த உத்தரவில், மனுதாரரின் கல்லூரி வெளியிட்ட மாணவர் சேர்க்கைக்கான குறிப்பேட்டில், படிப்புக்காலம் முழுவதுக்குமான கல்விக் கட்டணத்தைச் செலுத்த வேண்டும் எனக் குறிப்பிடப்படவில்லை. ஆனால் இடை நிற்றலுக்கான அபராதத் தொகையை வசூலிக்கலாம். எனவே மனுதாரரின் மாற்றுச்சான்றிதழ் உள்ளிட்ட சான்றிதழ்களை இரண்டு வார காலத்துக்குள் கல்லூரி நிர்வாகம் வழங்க வேண்டும். மனுதாரரிடமிருந்து அபராதத் தொகையை வசூலிக்க கல்லூரி நிர்வாகம் சம்பந்தப்பட்ட நீதிமன்றத்தை அணுகலாம்' என அந்த உத்தரவில் தெரிவிக்கப்பட்டுள்ளது.