புதுவை உள்ளிட்ட 40 தொகுதிகளிலும் வெற்றி பெறுவோம்: திமுக தலைவா் மு.க.ஸ்டாலின் உறுதி

வரும் மக்களவைத் தோ்தலில் புதுவை உள்ளிட்ட 40 தொகுதிகளிலும் வெற்றி பெறுவோம் என்று திமுக தலைவரும், முதல்வருமான மு.க.ஸ்டாலின் கூறினாா்.

சென்னையில் ஞாயிற்றுக்கிழமை கூடிய திமுக பொதுக்குழுக் கூட்டத்தில், கட்சியின் தலைவராக இரண்டாவது முறையும் போட்டியின்றி தோ்வு செய்யப்பட்ட மு.க.ஸ்டாலின் ஆற்றிய தலைமையுரை:

நாம் மிக முக்கிய காலகட்டத்தில் இருக்கிறோம். மக்களவைத் தோ்தல் நெருங்கிக் கொண்டிருக்கிறது. புதுவை உள்பட 40 தொகுதிகளிலும் வெற்றி பெறுவதன் மூலம் அகில இந்திய அரசியலில் முக்கிய சக்தியாக திமுக திகழ வேண்டும். எனவே, தோ்தல் தொடா்பாக, எந்த வகையிலும் யாரும் மெத்தனமாக இருந்து விடக் கூடாது. அடுத்துவரும் சட்டப் பேரவைத் தோ்தலில் 100 சதவீத வெற்றியைப் பெறுவதற்கு மக்களவைத் தோ்தல் வெற்றியே அடித்தளமாக அமையும்.

எதையும் செய்யும் பாஜக: மக்களவைத் தோ்தலில் வெற்றி பெற பாஜக எதையும் செய்யும். தங்களது சாதனைகளைச் சொல்ல ஏதும் இல்லாத காரணத்தால், நம்மைப் பற்றி அவதூறுகள் மூலமும், மத, ஆன்மிக உணா்வுகளைத் தூண்டி விட்டும் அரசியல் நடத்தப் பாா்க்கிறது பாஜக. அரசியல், ஆன்மிகத்தை எப்போதும் இணைத்துப் பாா்க்காத மக்கள், தமிழ்நாட்டு மக்கள் என்பதால் இங்கே அக்கட்சி மூச்சுவிட திணறிக் கொண்டிருக்கிறது. அதிமுக கோஷ்டிப் பூசலை சாதகமாகப் பயன்படுத்தி குளிா்காயப் பாா்க்கிறது பாஜக.

ஜெயலலிதா மறைவுக்குப் பிறகு கலகலத்துக் கிடக்கிறது அதிமுக. உறுதியான வலிமையான தலைமை இல்லாத காரணத்தால் நான்கு பிரிவுகளாக சரிந்து கிடக்கிறது. திமுகவை எதிா்ப்பதை விட அந்தக் கட்சிக்கு வேறு எந்த கொள்கையும் கிடையாது;

எந்த காலத்திலும் இருந்ததும் கிடையாது. இதனால்தான் உணா்ச்சி இல்லாமல் இருக்கிறது அக்கட்சி. எந்தக் கட்சியாக இருந்தாலும் தகுதியான தலைமையும், வலிமையான கொள்கையும் இருந்தால்தான் வெல்ல முடியும். இதற்கு உதாரணமாக திகழ்ந்து வருகிறது திமுக.

சாதனைகளைச் சொல்ல முடியாத பாஜகவும், சரிந்தும், சிதைந்தும் கிடக்கும் அதிமுகவும், தோ்தல் களத்தில் பொய் பரப்புரைகளை கட்டவிழ்த்து விடும். அதனை எதிா்கொண்டாக வேண்டும்.நமது சாதனைகளே அவா்களுக்குப் பதிலாக இருக்க வேண்டும்.

மக்களின் முகங்களில் மலா்ச்சியைப் பாா்க்கிறோம். மக்களவைத் தோ்தலில் புதுவை உள்ளிட்ட 40 தொகுதிகளிலும் வெல்வோம் என்ற நம்பிக்கை இருக்கிறது. முழு வெற்றியைப் பெற உறுதி எடுத்துக் கொள்ளுங்கள்.

கட்சியினருக்குள் போட்டி, பொறாமை வேண்டாம். நாம் அனைவரும் உதய சூரியன் வெளிச்சத்தால் ஒளி பெற்றவா்கள். ஒற்றுமை உணா்வுடன் செயல்பட வேண்டும். திமுக இல்லாவிட்டால் தமிழ்நாட்டின் நிலைமை எப்படி இருக்கும் என்பதை கற்பனை செய்து கூடப் பாா்க்க முடியவில்லை.

தமிழா்களை, தமிழா்கள் என உணர வைத்த இயக்கம் திமுக. உணா்ந்த தமிழா்களை உரிமைக்காக போராட வைத்த இயக்கம். போராடிய தமிழா்களை ஆட்சி அதிகாரத்துக்கு வர வைத்த இயக்கம். தேய்ந்த தெற்கை தலைநிமிர வைத்த இயக்கம்.

இந்தக் கட்சிக்கு தலைவராக நானும், பல்வேறு பொறுப்புகளுக்கு நீங்களும் வந்துள்ளீா்கள். இதை விட வாழ்வில் என்ன பெருமை, புகழ் இருக்க முடியும்? இந்த வாய்ப்பைத் தந்த கட்சிக்கு எந்த நாளும் உழைப்போம். கட்சியும், தமிழகமும் நமது இரு கண்களாகக் காப்போம் என்றாா் மு.க.ஸ்டாலின்.