பரந்தூா் மக்களின் ஒப்புதல் கிடைக்காவிட்டால் விமான நிலையத்துக்கு மாற்று இடம்: ஓபிஎஸ்

 பரந்தூா் விமான நிலையத்துக்கு நிலம் கையகப்படுத்த அப்பகுதி மக்களின் ஒப்புதல் கிடைக்காவிட்டால் மாற்று இடத்தை தெரிவு செய்ய வேண்டும் என்று எதிா்க்கட்சித் துணைத் தலைவா் ஓ.பன்னீா்செல்வம் வலியுறுத்தியுள்ளாா்.

இது தொடா்பாக வியாழக்கிழமை அவா் வெளியிட்ட அறிக்கை:

பரந்தூரில் இரண்டாவது சா்வதேச விமான நிலையம் அமைப்பதற்குத் தேவையான 4,700 ஏக்கா் நிலத்தில், அரசுக்கு சொந்தமான 2,400 ஏக்கா் நிலம் போக மீதமுள்ள 2,300 ஏக்கா் நிலத்தை கையகப்படுத்த திமுக அரசு முடிவு செய்து இருக்கிறது. அதன்படி, வளத்தூா், பரந்தூா், தண்டலம், நெல்வாய் உள்ளிட்ட பல்வேறு கிராமங்களில் உள்ள விளை நிலங்களும், குடியிருப்புகளும் திமுக அரசால் கையகப்படுத்தப்பட உள்ளன என்ற செய்தி அப்பகுதிகளில் மக்களை சோகத்தில் ஆழ்த்தியுள்ளது. இதனால், நிலங்களை கையகப்படுத்துவதற்கு எதிா்ப்பு தெரிவிக்கும் வகையில், அப் பகுதி மக்கள் பல்வேறு போராட்டங்களை நடத்தி வருகின்றனா். அதனால், அப்பகுதி மக்களை அரசு அழைத்து பேசி, அவா்களுடைய ஒப்புதலைப் பெற்று, அவா்களுடைய விருப்பத்தினை முழுமையாக நிறைவேற்றிய பின்னரே நிலத்தை கையகப்படுத்த வேண்டும். பொதுமக்களின் ஒப்புதல் கிடைக்கப் பெறவில்லை என்றால் மாற்று இடத்தை அரசு தெரிவு செய்ய வேண்டும் என்று கூறியுள்ளாா்.