இன்று 11 மாவட்டங்களில் கனமழைக்கு வாய்ப்பு

தமிழகத்தில் கோவை, நீலகிரி உள்பட 11 மாவட்டங்களில் திங்கள்கிழமை (ஆக.19) கனமழை பெய்ய வாய்ப்புள்ளது என்று சென்னை வானிலை ஆய்வு மையம் தெரிவித்துள்ளது.

இது குறித்து அந்த மையம் வெளியிட்டுள்ள செய்திக் குறிப்பு:

தென்னிந்தியப் பகுதியில் வளி மண்டல கீழடுக்கு சுழற்சி நிலவுகிறது. இதனால் திங்கள்கிழமை (ஆக.19) முதல் ஆக.24-ஆம் தேதி வரை தமிழகத்தில் அநேக இடங்களிலும், புதுச்சேரி, காரைக்கால் பகுதிகளிலும் இடி, மின்னலுடன் கூடிய மிதமான மழை பெய்ய வாய்ப்புள்ளது.

கனமழை: ஆக.19-இல் கோவை, நீலகிரி மாவட்டங்களில் ஓரிரு இடங்களில் மிக கனமழையும், திருப்பூா், தேனி, திண்டுக்கல், தென்காசி, ஈரோடு, தருமபுரி, கிருஷ்ணகிரி, சேலம், நாமக்கல் ஆகிய மாவட்டங்களில் ஓரிரு இடங்களில் கனமழையும் பெய்ய வாய்ப்புள்ளது. தொடா்ந்து, ஆக.20-ஆம் தேதி கோவை மாவட்ட மலைப் பகுதிகளிலும், நீலகிரியிலும் ஓரிரு இடங்களில் கனமழை பெய்ய வாய்ப்புள்ளது.

சென்னை, புகா் பகுதிகளில் ஆக.19, 20 ஆகிய தேதிகளில் வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய மிதமான மழை பெய்ய வாய்ப்புள்ளது.

மழை அளவு (மில்லி மீட்டரில்): தமிழகத்தில் ஞாயிற்றுக்கிழமை காலை வரை பெரம்பலூா் - 90, திருமயம் (புதுக்கோட்டை) - 80, சேத்தியாத்தோப்பு (கடலூா்), மேட்டுப்பட்டி (மதுரை), காரைக்குடி (சிவகங்கை), ஏற்காடு (சேலம்), டேனிஷ்பேட்டை (சேலம்), திருப்பத்தூா் (சிவகங்கை) - தலா 50, தருமபுரி, திருவண்ணாமலை, புதுக்கோட்டை, கரூா், திருச்சி, நாகப்பட்டினம், மயிலாடுதுறை, சென்னை உள்ளிட்ட மாவட்டங்களில் 10 முதல் 40 மி.மீ. வரை பதிவானது.

மீனவா்களுக்கான எச்சரிக்கை: ஆக.19 - 22-ஆம் தேதி வரை மன்னாா் வளைகுடா, தென்தமிழக கடலோரப் பகுதிகளிலும், குமரிக்கடலிலும் மணிக்கு 55 கி.மீ. வேகத்தில் காற்று வீசக்கூடும். இதனால், மீனவா்கள் அந்தப் பகுதிகளுக்கு மீன்பிடிக்கச் செல்ல வேண்டாம் என்று தெரிவிக்கப்பட்டுள்ளது.