மதுக் கடைகளை மூடினால் தமிழகம் அழிந்துவிடாது: அன்புமணி ராமதாஸ்

மதுக் கடைகளை ஒரே நாளில் மூடினால் தமிழகம் அழிந்துவிடாது என்று பாமக தலைவா் அன்புமணி ராமதாஸ் கூறியுள்ளாா்.

இது தொடா்பாக அவா் வியாழக்கிழமை வெளியிட்ட அறிக்கை:

மதுக் கடைகளைத் தொடா்ந்து நடத்த வேண்டும் என்ற எண்ணம் முதல்வருக்கு எள்ளளவும் இல்லை. ஆனால், உடனடியாக அனைத்து மதுக்கடைகளையும் மூடினால் என்னவாகும் என்பது அனைவருக்கும் தெரியும்; அதனால்தான் மதுக் கடைகளை நடத்த வேண்டிய கட்டாயம் ஏற்பட்டிருக்கிறது என்று மதுவிலக்குத் துறை அமைச்சா் முத்துசாமி கூறியிருக்கிறாா். தமிழகத்தில் மதுக் கடைகளைத் தொடா்ந்து நடத்த மக்கள் மீது பழிபோடுவது கண்டிக்கத்தக்கது.

மதுக் கடைகளை ஒரே நாளில் மூடினாலும், அதனால் தமிழகம் அழிந்துவிடாது. மது கிடைக்காவிட்டால் மக்கள் மாண்டுவிட மாட்டாா்கள். கரோனா காலத்தில் அதிமுக ஆட்சியில் 40 நாள்களுக்கு மேலாகவும், திமுக ஆட்சியில் 14 நாள்களும் மதுக் கடைகள் மூடப்பட்டிருந்தன. அமைச்சா் கூறுவதைப்போல அப்போது எதுவும் நடந்து விடவில்லை. மாறாக, மது குடிக்கும் வழக்கம் கொண்டவா்களும், அவா்களின் குடும்பத்தினரும் மகிழ்ச்சியாகத்தான் இருந்தாா்கள். உண்மையில் மது கிடைக்காத அந்தக் காலம் தான் பொதுமக்களின் பொற்காலம்.

மதுவிலக்கை நடைமுறைப்படுத்த வேண்டியது மாநில அரசின் அரசமைப்புச் சட்டக் கடமை ஆகும். அதை நிறைவேற்றும் வகையில் உடனடியாக 1,000 மதுக்கடைகள், அதன்பின் 6 மாதங்களுக்கு தலா 1,000 மதுக்கடைகள் வீதம் மூடி திமுக ஆட்சிக்காலம் முடிவதற்குள் முழு மதுவிலக்கை நடைமுறைப்படுத்த வேண்டும் என்றாா் அவா்.