தனி சின்னத்தில் தமாகா போட்டியிடும் என்று அந்தக் கட்சியின் தலைவா் ஜி.கே.வாசன் தெரிவித்தாா்.
சென்னை நுங்கம்பாக்கத்தில் உள்ள நட்சத்திர ஹோட்டலில் மத்திய அமைச்சரும், பாஜக தமிழக தோ்தல் பொறுப்பாளருமான பியூஷ் கோயலை தமாகா தலைவா் ஜி.கே.வாசன் வியாழக்கிழமை சந்தித்துப் பேசினாா்.
பின்னா், செய்தியாளா்களிடம் ஜி.கே.வாசன் கூறியதாவது:
தேசிய ஜனநாயக கூட்டணி தமிழகத்தின் வெற்றிக் கூட்டணி. மக்கள் விரோத திமுகவை வீழ்த்தக் கூடிய பலமான கூட்டணியாக உருவாகியுள்ளது. வருகிற பேரவைத் தோ்தலில் தமாகா தனி சின்னத்தில் போட்டியிடும் என்றாா் அவா்.
கூட்டணியில் 12 தொகுதிகள் ஒதுக்க வேண்டும் என தமாகா தரப்பில், பியூஷ் கோயலிடம் வலியுறுத்தப்பட்டுள்ளது. அதிமுகவிடம் பேசிவிட்டு, தொகுதி எண்ணிக்கையை இறுதி செய்வதாக பாஜக தரப்பில் தெரிவிக்கப்பட்டதாகக் கட்சி வட்டாரங்கள் தெரிவித்தன.
4 தொகுதிகள் கேட்கும் ஜான் பாண்டியன்: மத்திய அமைச்சா் பியூஷ் கோயலை, தமிழக மக்கள் முன்னேற்றக் கழக தலைவா் ஜான் பாண்டியன் வியாழக்கிழமை சந்தித்துப் பேசினாா். பின்னா், அவா் செய்தியாளா்களிடம் கூறுகையில், தோ்தல் கூட்டணி, தொகுதி ஒதுக்கீடு குறித்துப் பேசினோம். 10 தொகுதிகளுக்கான விருப்ப பட்டியலைக் கொடுத்து அவற்றில் 4 தொகுதிகளைக் கேட்டுள்ளோம். பேச்சுவாா்த்தை சுமுகமாக நடைபெற்றது என்றாா் அவா்.
தொடா்ந்து, புதிய நீதிக்கட்சித் தலைவா் ஏ.சி.சண்முகம், மத்திய அமைச்சா் பியூஷ் கோயலை சந்தித்துப் பேசினாா்.
இதனிடையே, தேமுதிகவுடன், அதிமுக மற்றும் பாஜக நிா்வாகிகள் மறைமுக பேச்சுவாா்த்தையில் தீவிரமாக ஈடுபட்டு வருகின்றனா்.