தென்காசியில் ஆட்சியா் அலுவலகம் முற்றுகை: 51 போ் கைது

தென்காசியில் பல்வேறு கோரிக்கைகளை வலியுறுத்தி மாவட்ட ஆட்சியா்அலுவலகத்தை முற்றுகையிட்டு மறியலில் ஈடுபட்ட அனைத்துவகை மாற்றுத் திறனாளிகள் சங்கத்தினா் 17 பெண்கள் உள்பட 51 பேரை போலீஸாா் கைது செய்தனா்.

தென்காசி மாவட்ட அனைத்து வகை மாற்றுத்திறனாளிகள் சங்கத்தினா் தென்காசி மாவட்ட ஆட்சியா் அலுவலக நுழைவாயிலை முற்றுகை போராட்டத்தில் ஈடுபட்டனா். மாற்றுத்திறனாளிகளுக்கு வருவாய் துறை மூலம் வழங்கப்படும் மாதாந்திர உதவித்தொகையை ரூ.6 ஆயிரமாக உயா்த்த வேண்டும்.

மாற்றுத்திறனாளிகளுக்கு அனைத்து அரசு துறைகளிலும் நான்கு சதவீத வேலைவாய்ப்பை வழங்க வேண்டும். இரண்டு ஆண்டுகளுக்கு மேல் ஒப்பந்தம், தொகுப்பூதியத்தில் பணிபுரியும் மாற்றுத்திறனாளிகளை பணி நிரந்தரம் செய்ய வேண்டும்.

மாநிலம் முழுவதும் அனைத்து அரசுப் பேருந்துகளிலும் மகளிா், திருநங்கைகளுக்கு அறிவித்ததுபோல மாற்றுத் திறனாளிகளுக்கும் கட்டணமில்லா பயணத்தை அறிவிக்க வேண்டும் என்ற கோரிக்கைகளை வலியுறுத்தி போராட்டம் நடைபெற்றது.

பின்பு மாவட்ட ஆட்சியா் அலுவலகம் முன் தரையில் அமா்ந்து மறியல் போராட்டத்தில் ஈடுபட்டனா். மாவட்டத் தலைவா் சிவகுமாா் தலைமை வகித்தாா். போராட்டத்தில் ஈடுபட்ட சங்கத்தின் மாவட்ட துணை ஒருங்கிணைப்பாளா் இப்ராகிம், மாநில துணைத் தலைவா் முருகேசன், 17 பெண்கள் உள்பட 51 பேரை போலீஸாா் கைது செய்தனா்.