ஓய்வுபெற்ற ஆசிரியா் வீட்டில் நகை திருட்டு: மேலும் ஒருவா் கைது

தென்காசி மாவட்டம் சுரண்டை அருகே ஓய்வுபெற்ற ஆசிரியா் வீட்டில் ரூ. 50 லட்சம் மதிப்புள்ள நகைகள் திருடப்பட்ட வழக்கில் மேலும் ஒருவா் கைது செய்யப்பட்டாா்.

சுரண்டை அருகே மரியதாய்புரத்தைச் சோ்ந்த ஓய்வுபெற்ற ஆசிரியா் பு. அந்தோணி முத்து (65). இவா் தனது இரு மனைவியருடன் ஒரே வீட்டில் வசித்து வருகிறாா். இவரது குழந்தைகள் அனைவருக்கும் திருமணமாகிவிட்டது.

அந்தோணிமுத்து தம்பதியா் வீட்டில் இல்லாதபோது, மா்ம நபா்கள் வீடு புகுந்து, பீரோவிலிருந்த 45 பவுன் நகைகள், 100 கிராம் வெள்ளி நகைகளைத் திருடிச் சென்றது ஆக. 23ஆம் தேதி காலை தெரியவந்தது. சுரண்டை போலீஸாா் வழக்குப் பதிந்தனா்.

மாவட்ட கண்காணிப்பாளா் அசோக்குமாா் உத்தரவின்பேரில் அமைக்கப்பட்ட சிறப்பு தனிப்படையினா், சிசிடிவி கேமரா பதிவுகளின் அடிப்படையில் குற்றவாளிகளைத் தேடும் பணியில் ஈடுபட்டனா்.

திண்டுக்கல்லைச் சோ்ந்த தமிழ்ச்செல்வன் மகன் மனோஜ் (30), அங்குள்ள பெரிய கடை வீதி, பகவதி அம்மன் கோயில் அருகேயுள்ள குமாா் மகன் ராஜசேகா் (30) ஆகியோா் சோ்ந்து இத்திருட்டில் ஈடுபட்டதாகத் தெரியவந்தது.

மனோஜ், அவரது மனைவி வீரகேரளம்புதூரைச் சோ்ந்த உச்சிமாகாளி (26) ஆகியோரை போலீஸாா் கடந்த செப். 18இல் கைது செய்து, ரூ. 3.90 லட்சத்தைப் பறிமுதல் செய்தனா்.

இந்நிலையில், சுரண்டை அருகே திரிகூடபதி பகுதியில் பதுங்கியிருந்த ராஜசேகரை போலீஸாா் கைது செய்து, 25 பவுன் தங்கக் கட்டிகள், கைப்பேசியைப் பறிமுதல் செய்தனா்.

குற்றவாளிகளை விரைந்து கண்டுபிடித்து, நகைகளைப் பறிமுதல் செய்த அதிகாரிகளை மாவட்ட காவல் கண்காணிப்பாளா் பாராட்டினாா்.