4 மடங்கான எல்ஐசி ஹவுசிங் ஃபைனான்ஸ் நிகர லாபம்

எல்ஐசி ஹவுசிங் ஃபைனான்ஸ் நிறுவனத்தின் கடந்த செப்டம்பா் காலாண்டு நிகர லாபம் ஏறத்தாழ 4 மடங்காக அதிகரித்துள்ளது.

இது குறித்து நிறுவனம் வெளியிட்டுள்ள அறிக்கையில் தெரிவிக்கப்பட்டுள்ளதாவது:

கடந்த ஜூலை முதல் செப்டம்பா் வரையிலான நடப்பு நிதியாண்டின் 2-ஆவது காலாண்டில் நிறுவனத்தின் நிகர லாபம் ரூ.1,188 கோடியாக உள்ளது.

முந்தைய 2022-23-ஆம் நிதியாடின் இதே காலாண்டில் இது ரூ.305 கோடியாக இருந்தது. அதனுடன் ஒப்பிடுகையில் தற்போது நிறுவனத்தின் நிகர லாபம் ஏறத்தாழ 4 மடங்கு ஆகியுள்ளது.

மதிப்பீட்டு காலாண்டில் நிறுவனத்தின் மொத்த வருவாய் ரூ. 5,086 கோடியிலிருந்து ரூ.6,753 கோடியாக அதிகரித்துள்ளது. வட்டி வருவாய் ரூ.5,049 கோடியிலிருந்து ரூ.6,707 கோடியாக அதிகரித்துள்ளது.

நிகர வாராக் கடன் விகிதம் 2.83 சதவீதத்திலிருந்து 2.59 சதவீதமாக குறைக்கப்பட்டுள்ளது என்று அந்த அறிக்கையில் தெரிவிக்கப்பட்டுள்ளது.