வங்கிகளுக்கான வட்டி விகிதத்தை (ரெப்போ ரெட்) இந்திய ரிசா்வ் வங்கி (ஆா்பிஐ) 0.50 சதவீதம் குறைத்து 5.5 சதவீதமாக நிா்ணயித்துள்ளது. இதனால், வீடு, வாகனம், தனிநபா் கடன் உள்ளிட்ட பல்வேறு கடன்களுக்கான வட்டி விகிதம் மேலும் குறைய வாய்ப்பு ஏற்பட்டுள்ளது.
அதே நேரத்தில் வங்கிகளில் நிரந்தர வைப்பு, தொடா் வைப்பு உள்ளிட்ட சேமிப்புத் திட்டங்களுக்கு வங்கிகள் அளிக்கும் வட்டி குறைக்கப்படும் சூழல் உருவாகியுள்ளது.
ஏற்கெனவே தொடா்ந்து இரண்டு முறை வட்டி விகிதம் 0.25 சதவீதம் குறைக்கப்பட்ட நிலையில், இப்போது மூன்றாவது முறையாக 0.50 சதவீதம் குறைக்கப்பட்டுள்ளது. ஆா்பிஐ-யின் வட்டி விகித குறைப்பு, நாட்டின் பொருளாதாரத்துக்கு ஊக்கமளிக்கும் நடவடிக்கையாகக் கருதப்படுகிறது. இது தொழில் துறையினா், வா்த்தகா்கள், நுகா்வோருக்கும் சாதகமானதாகும். பல்வேறு தரப்பினரும் இதை வரவேற்றுள்ளனா். கட்டுமானத் துறை, வாகன விற்பனை, உற்பத்தி உள்ளிட்ட பல்வேறு பணப்புழக்கம் அதிகரிக்கும். இது நாட்டில் பொருளாதாரச் செயல்பாடுகளை அதிகரிக்கும்.
வங்கி ரொக்க இருப்பு விகிதம் குறைப்பு: யாரும் எதிா்பாராத நடவடிக்கையாக வங்கிகள் ரிசா்வ் வங்கியில் இருப்பு வைக்க வேண்டிய வங்கி ரொக்க இருப்பு விகிதம் (சிஆா்ஆா்) ஒரு சதவீதம் குறைக்கப்பட்டுள்ளது. இதன் மூலம் கூடுதலாக ரூ.2.5 லட்சம் கோடி வங்கி நிதி இந்த ஆண்டு இறுதிக்குள் புழக்கத்துக்கு வரும். இது நாட்டில் பணப்புழக்கத்தை மேலும் அதிகரிக்கும்.
ஆா்பிஐ ஆளுநா் சஞ்சய் மல்ஹோத்ரா தலைமையில் ஆா்பிஐ-யின் நிதிக் கொள்கைக் குழுவின் கூட்டம் மும்பையில் வெள்ளிக்கிழமை நடைபெற்றது. இதில் வட்டி விகிதத்தை 0.50 சதவீதம் குறைக்க 6 உறுப்பினா்களில் 5 போ் ஆதரவு அளித்தனா்.
தாராள நிதிப்புழக்கம்: கூட்டத்துக்குப் பிறகு செய்தியாளா்களிடம் ஆா்பிஐ ஆளுநா் சஞ்சய் மல்ஹோத்ரா கூறியதாவது: கடந்த 6 மாதங்களில் பணவீக்கமும், விலைவாசி உயா்வும் குறிப்பிடத்தக்க அளவு குறைந்துள்ளது. அதே நேரத்தில் பொருளாதார வளா்ச்சி எதிா்பாா்த்ததைவிட குறைவாக உள்ளது. சவால்மிகுந்த சா்வதேச சூழல், பொருளாதார நிச்சயமற்ற சூழல் ஆகியவை இதற்கு காரணமாகும்.
எனவே, உள்நாட்டில் நுகா்வு சாா்ந்த நடவடிக்கைகளை அதிகரிக்க வேண்டியுள்ளது. உள்நாட்டு முதலீடு மேம்பட வேண்டும். அதற்கு ஏற்ப ஆா்பிஐ நிதிக்கொள்கையில் மாற்றங்களைச் செய்துள்ளது. வட்டி விகிதக் குறைப்பு வளா்ச்சிக்கு உதவிகரமாக இருக்கும். வங்கிகளில் நிதிப்புழக்கம் தாராளமாக இருக்க வேண்டும் என்பதில் ஆா்பிஐ உறுதியாக உள்ளது. நாட்டின் பொருளாதார அடிப்படை தொடா்ந்து மிக வலுவாகவே உள்ளது. இந்த சூழலில் நிதிக்கொள்கை வளா்ச்சியை ஊக்குவிப்பதாகவே இருக்க வேண்டும்.
பணவீக்கம்: இந்த ஆண்டு பருவமழை வழக்கமான அளவில் இருக்கும் என்றே கணிக்கப்பட்டுள்ளது. சா்வதேச அளவிலும் பொருள்களின் விலையேற்றம் அதிகம் இருக்காது. எனவே, 2025-26 நிதியாண்டில் நுகா்வோா் விலைக் குறியீட்டு எண் அடிப்படையிலான பணவீக்கம் 3.7 சதவீதமாக இருக்கும். இதற்கு முன்பு 4 சதவீதம் என கணிக்கப்பட்டிருந்தது. இந்தியா-பாகிஸ்தான் மோதலால் பாதிப்பு? அண்மையில் இந்தியா-பாகிஸ்தான் இடையே ஏற்பட்ட சண்டையால் நாட்டின் பொருளாதார நடவடிக்கைகளை பாதிக்கவில்லை என்று ஆா்பிஐ ஆளுநா் தெரிவித்தாா்.
இது தொடா்பாக அவா் மேலும் கூறுகையில், ‘அண்மையில் ஏற்பட்ட சண்டை மிகவும் குறுகிய காலமே நீடித்தது. இதனால் நாட்டின் பொருளாதார நடவடிக்கைகள் எவ்விதத்திலும் பாதிக்கவில்லை. ஒரு சில பொருள்கள் விலை சற்று அதிகரித்தது. அதுவும் இப்போது இயல்பு நிலைக்கு வந்துவிட்டது. அதேபோல நாட்டில் கரானா பாதிப்பு அதிகரிப்பதும் இப்போதைக்கு எவ்விதத் தாக்கத்தையும் ஏற்படுத்தாது’ என்றாா்.
‘கிரிப்டோகரன்சி’ கட்டுப்பாடுகள் குறித்து தெளிவான கொள்கையை வகுக்க மத்திய அரசுக்கு உச்நீதிமன்றம் அண்மையில் அறிவுறுத்தியது தொடா்பான கேள்விக்கு, ‘கிரிப்டோகரன்சி என்பது பொருளாதார ஸ்திரத்தன்மைக்கு பிரச்னை ஏற்படுத்தக் கூடியது.
மத்திய அரசு இது தொடா்பாக குழு அமைத்து ஆய்வு செய்ய இருக்கிறது’ என்றாா். நாட்டின் அந்நியச் செலாவணி கையிருப்பு மேலும் குறைந்து 691.5 பில்லியன் டாலராக (மே 30 நிலவரம்) உள்ளது. அடுத்த நிதிக் கொள்கைக்குழு கூட்டம் ஆகஸ்ட் 4 முதல் 6-ஆம் தேதி வரை நடைபெறும் என்று தெரிவிக்கப்பட்டுள்ளது.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.