யமஹாவுக்குப் போட்டியாக டிவிஎஸ்ஸில் புதிய ரேசர் பைக்!

யமாஹா நிறுவனத்தின் ரேசர் பைக்குகளுக்கு இணையாக டிவிஎஸ் நிறுவனமும் கஃபே ரேசர் பைக்குகளை தயாரிக்கும் திட்டத்தில் உள்ளது.

இந்த புதிய பைக்கில் டிவிஎஸ்ஸின் தற்போதைய ரோனின் மாடலை விட முற்றிலும் மாறுபட்ட அதே வேளையில் இளைஞர்களைக் கவரும் வகையிலான வடிவமைப்பைக் கொடுண்டுவர திட்டமிடப்பட்டுள்ளது.

ரோனின் பைக்கில் உள்ளதைப்போன்று, 225சிசி, ஆயில்-கூல்டு, சிங்கிள்-சிலிண்டர் எஞ்சின் பயன்படுத்த வாய்ப்புள்ளது. ஏனெனில் ரோனின் மாடல் பைக்கில் இந்த என்ஜின் சிறந்த பங்களிப்பை அளித்து வருகிறது.

சுமார் 20.4 hp சக்தியும் 19.9 Nm டார்க் திறனும் கொண்டதாக இருக்கும். 5 வகையான ஸ்பீடு கியர்பாக்ஸ் உடன் வரும் இந்த அமைப்பு, அதிகபட்ச செயல்திறன் மேம்பாட்டை விட சவாரி பாணி மற்றும் வடிவமைப்பு மேல் கவனம் செலுத்தும் வகையில் இருக்கும் எனத் தெரிகிறது.

சிறிய ஹெட்லைட் ஃபேரிங், பின்புற இருக்கை இல்லாமல் ஒற்றை இருக்கை கொண்ட வடிவமைப்பு, முன்புறம் சாய்ந்த ஓட்டுநர் நிலை, கிளிப்-ஆன் ஹேண்டில் போன்றவை இதன் சிறப்புகளாகக் கருதப்படுகின்றன.

கஃபே ரேசர் பைக் வடிவத்தில் புதிய மாடலை தயாரிப்பதற்கான காப்புரிமையை டிவிஎஸ் நிறுவனம் பெற்றுள்ளது. எனினும் இது குறித்து டிவிஎஸ் நிறுவனம் அதிகாரப்பூர்வ அறிவிப்பை வெளியிடவில்லை. காப்புரிமை பெற்ற அனைத்தையும் தயாரிக்க வேண்டிய கட்டாயமில்லை; அதே வேளையில் அவை எதிர்காலத்தில் உருவாக்கப்படலாம் எனவும் எதிர்பார்க்கப்படுகிறது.