ஆக்கிரமிப்பு உக்ரைன் கனிமங்களை அமெரிக்காவுக்கு விற்கத் தயார்: விளாதிமீர் புதின்

தங்களால் ஆக்கிரமிக்கப்பட்டுள்ள உக்ரைன் பகுதிகள் உள்ளிட்ட இடங்களில் இருக்கும் அரியவகை கனிமப் பொருள்களை அமெரிக்காவுக்கு விற்பனை செய்யத் தயாராக இருப்பதாக ரஷிய அதிபர் விளாதிமீர் புதின் அறிவித்துள்ளார்.

ரஷியாவுடனான போரில் உக்ரைனுக்கு அளித்த உதவிகளுக்குப் பதிலாக அந்த நாட்டின் அரியவகை கனிமங்கள் தங்களுக்கு அளிக்கப்பட வேண்டும் என்று அமெரிக்க அதிபர் டொனால்ட் டிரம்ப் வலியுறுத்திவரும் சூழலில் புதின் இவ்வாறு அறிவித்துள்ளது குறிப்பிடத்தக்கது.

இது குறித்து தனது அமைச்சர்கள் மற்றும் பொருளாதார ஆலோசகர்களுடன் காணொலி மூலம் நடத்திய ஆலோசனைக் கூட்டத்தில் புதின் பேசியதாவது:

அரியவகை கனிமங்கள் விவகாரத்தில் அமெரிக்கா உள்ளிட்ட அனைத்து கூட்டாண்மை நாடுகளுடனும் இணைந்து செயல்படத் தயாராக இருக்கிறோம். ரஷியாவில் இருந்து அமெரிக்கா பெருமளவில் அலுமினியம் இறக்குமதி செய்துவந்தது. அதை அந்த நாடு மீண்டும் தொடங்கலாம்.

உக்ரைனில் இருப்பதைவிட ரஷியாவில் மிக அதிகமாக கனிம வளம் உள்ளது. அரியவகைக் கனிமங்களை தோண்டியெடுப்பதற்காக அமெரிக்காவுடன் மேற்கொள்ளக்கூடிய ஒப்பந்தத்தில் உக்ரைன் பகுதியாக இருந்து தற்போது ரஷியாவுடன் இணைக்கப்பட்டுள்ள பகுதிகளும் இடம் பெறும் என்றார் புதின்.

நேட்டோ ராணுவக் கூட்டமைப்பில் உக்ரைன் இணைவதற்கு எதிர்ப்பு தெரிவித்து, அந்த நாட்டின் மீது ரஷியா கடந்த 2022 பிப்ரவரி மாதம் படையெடுத்தது. அதையடுத்து, அப்போதைய அதிபர் ஜோ பைடன் தலைமையிலான அமெரிக்க அரசும், மேற்கத்திய நாடுகளும் ரஷியாவுக்கு எதிரான போரில் உக்ரைனுக்கு உதவிகளை வாரி வழங்கின.

இந்தச் சூழலில், அமெரிக்காவின் புதிய அதிபராக கடந்த மாதம் பதவியேற்ற டொனால்ட் டிரம்ப், இந்த விவகாரத்தில் ஜோ பைடன் அரசுக்கு எதிர்மாறான நிலைப்பாட்டை மேற்கொண்டுவருகிறார்.

ரஷியாவிடம் இழந்த பகுதிகளை உக்ரைன் மீட்க முடியாது என்பதை அனைவரும் ஏற்றுக் கொள்ள வேண்டும் என்று வெளிப்படையாகக் கூறும் டிரம்ப் அரசு, உக்ரைனுக்கு நேட்டோவில் இடம் அளிக்கப்படாது என்று திட்டவட்டமாகக் கூறிவருகிறது.

மேலும், உக்ரைன் போர் விவகாரம் தொடர்பாக முந்தைய அமெரிக்க அரசால் தனிமைப்படுத்தப்பட்டிருந்த ரஷிய அதிபர் விளாதிமீர் புதினுடன் தொலைபேசியில் உரையாடி டிரம்ப் உறவைப் புதுப்பித்துக்கொண்டார். இன்னும் சில வாரங்களில் அவர்கள் இருவரும் நேரில் சந்தித்து பேச்சுவார்த்தை நடத்துவார்கள் என்று எதிர்பார்க்கப்படுகிறது.

இதற்கிடையே, போரில் உக்ரைனுக்கு தாங்கள் அளித்த உதவிகளுக்கு ஈடாக அந்த நாட்டின் அரியவகைக் கனிம வளங்களை வெட்டியெடுக்கும் உரிமை தங்களுக்கு காலவரையில்லாமல் வழங்கப்பட வேண்டும் என்று டிரம்ப் வலியுறுத்திவருகிறார்.

இந்தச் சூழலில், ரஷியாவுடன் மிகப் பெரிய அளவிலான பொருளாதார மேம்பாட்டு பரிமாற்றங்கள் மேற்கொள்ளப்படவுள்ளதாக அதிபர் டிரம்ப் வாஷிங்டனில் செய்தியாளர்களிடம் தெரிவித்தார்.

அவர் அவ்வாறு கூறிய சில மணி நேரங்களில் முன்னறிவிப்பின்றி அமைச்சர்கள் மற்றும் ஆலோசகர்கள் கூட்டத்தைக் கூட்டிய அதிபர் புதின், ஆக்கிரமிப்பு உக்ரைன் உள்ளிட்ட அனைத்து பகுதிகளில் இருந்தும் அரியவகைக் கனிமங்களை அமெரிக்காவுக்கு விற்பனை செய்ய தயாராக இருப்பதாகத் தெரிவித்துள்ளார்.