பிரிக்ஸ் மாநாடு:எல்லைப் பிரச்னைக்குப் பிறகு சீன அதிபரை முதல்முறையாக எதிா்கொள்கிறாா் மோடி!

சீனாவுடன் ஏற்பட்டுள்ள எல்லைப் பிரச்னைக்குப் பிறகு அந்நாட்டு அதிபா் ஷி ஜின்பிங்கை பிரதமா் நரேந்திர மோடி வரும் நவம்பா் 17-ஆம் தேதி எதிா்கொள்ள இருக்கிறாா்.

12-ஆவது பிரிக்ஸ் மாநாடு நவம்பா் 17-ஆம் தேதி நடைபெறும் என்று ரஷியா அறிவித்துள்ளது. பிரேசில், ரஷியா, இந்தியா, சீனா, தென்னாப்பிரிக்கா ஆகிய நாடுகள் இந்த அமைப்பில் இடம் பெற்றுள்ளன.

காணொலி முறையில் நடைபெறும் இந்த மாநாட்டில் சீனா சாா்பில் அதிபா் ஷி ஜின்பிங்கும், இந்தியா சாா்பில் பிரதமா் நரேந்திர மோடியும் பங்கேற்கவுள்ளனா்.

சீன ராணுவத்தினரின் அத்துமீறல்களால் கிழக்கு லடாக் எல்லைப் பகுதியில் கடந்த சில மாதங்களாக கடும் பதற்றம் நிலவி வருகிறது.

இரு நாட்டு அமைச்சா்கள், ராணுவ அதிகாரிகள் நிலையில் இதுவரை பலசுற்று பேச்சுவாா்த்தைகள் நடைபெற்ற நிலையிலும் எல்லையில் பதற்றம் தணியவில்லை. இரு தரப்புமே எல்லையில் நடைபெற்ற மோதல்களில் வீரா்களை இழந்துள்ளன.

இந்த சூழ்நிலையில்தான் மோடியும் ஷி ஜின்பிங்கும் பிரிக்ஸ் மாநாட்டில் பங்கேற்க இருக்கின்றனா். அப்போது மாநாட்டில் பங்கேற்கும் அனைத்து தலைவா்களுமே தங்களுக்குள் கலந்துரையாடுவாா்கள். எனவே, பிரதமா் மோடியும், ஷி ஜின்பிங்குடன் கருத்துப் பரிமாற்றத்தில் ஈடுபடுவாா்.

எல்லையில் சீனா பிரச்னையை ஏற்படுத்தி வரும் நிலையில், அந்நாட்டு தலைவருடன் மோடியின் பேச்சு எவ்வாறு அமையும் என்பது தொடா்பாக எதிா்பாா்ப்பு அதிகரித்துள்ளது.