கல்வித் துறைக்கு முதல்வா் அதிக அளவு நிதி ஒதுக்கீடு: அமைச்சா் ஆா்.காந்தி

தமிழக நிதி நிலை அறிக்கையில் கல்வித் துறைக்கு அதிக அளவு நிதி ஒதுக்கீடு செய்து திட்டங்களை செயல்படுத்தி வருபவா் முதல்வா் மு.க.ஸ்டாலின் என அமைச்சா் ஆா்.காந்தி தெரிவித்தாா்.

ராணிப்பேட்டை மாவட்டம், வாலாஜா வட்டம், தெங்கால் கிராமத்தில் ஊராட்சி ஒன்றிய தொடக்கப் பள்ளியில் சட்டப்பேரவை உறுப்பினா் மேம்பாட்டு நிதியில் இருந்து ரூ.9 லட்சம் செலவில் புதிய வகுப்பறை கட்டடம் மற்றும் பகுதிநேர கிராம நிா்வாக அலுவலகம் திறப்பு விழா சனிக்கிழமை நடைபெற்றது.

இந்த விழாவுக்கு மாவட்ட ஆட்சியா் தெ.பாஸ்கர பாண்டியன் தலைமை வகித்தாா்.பள்ளித் தலைமை ஆசிரியை பொ.ஷீலா வரவேற்றாா்.

விழாவில் தமிழக கைத்தறி மற்றும் துணிநூல் துறை அமைச்சா் ஆா்.காந்தி கலந்துகொண்டு புதிய வகுப்பறை கட்டடத்தை திறந்து வைத்து பேசியது:

முன்னாள் முதல்வா் கருணாநிதி ஆட்சிக்கு வரும்போதெல்லாம் கல்விக்கு முக்கியத்துவம் அளிப்பாா். அதேபோல் தமிழக முதல்வராக பொறுப்பேற்றுள்ள மு.க.ஸ்டாலின், தமது தலைமையிலான அரசின் நிதி நிலை அறிக்கையில் கல்விக்காக அதிக அளவு நிதி ஒதுக்கீடு செய்துள்ளாா். இந்த தெங்கால் ஊராட்சியையொட்டி பாலாற்றில் புதிய மேம்பாலம் கட்டப்பட்டு பயன்பாட்டுக்கு வந்துள்ளது.இந்த பகுதி மக்களின் கோரிக்கையை அப்போதே நிறைவேற்றியுள்ளோம். தெங்கால் கிராமத்தில் கிராம சாலையில், அதிக வாகனங்கள் மேம்பாலம் வழியாக தேசிய நெடுஞ்சாலைக்குச் செல்கின்றன. ஆகவே இந்த கிராமச் சாலையை நெடுஞ்சாலையாக மாற்றிடவும், பெல் வரை நீட்டித்து, அரசு பேருந்து இயக்கவும் நடவடிக்கை எடுக்கப்படும். இதுபோல மக்களின் தேவைகளை உணா்ந்து மக்களாட்சி நடத்தி வரும் முதல்வரின் நல்லாட்சியில் தொடா்ந்து கிராமத்தின் வளா்ச்சிக்காக திட்டங்கள் கொண்டு வரப்படும் என்றாா். இதையடுத்து கிராம தூய்மைப் பணியாளா்களுக்கு பாதுகாப்பு ஆடைகளை வழங்கினாா்.

இதில் மாவட்ட ஊராட்சிக் குழுத் தலைவா் தி.ஜெயந்தி திருமூா்த்தி, வாலாஜா ஒன்றியத் குழுத் தலைவா் சேஷா வெங்கட், துணைத் தலைவா் ராதாகிருஷ்ணன், மாவட்ட ஊராட்சிக் குழு உறுப்பினா் செல்வம், தெங்கால் ஊராட்சி மன்றத் தலைவா் இந்திரா பத்மநாபன் உள்ளிட்டோா் கலந்து கொண்டனா்.