செங்கம் பகுதியில் கால்நடைகளுக்கான மருத்துவ முகாம் நடத்தக் கோரிக்கை

செங்கம் பகுதியில் மாடுகளுக்கு நோய்கள் பரவி உயிரிழந்து வருவதால், இந்தப் பகுதியில் கால்நடைத் துறையினர் முகாம் நடத்த நடவடிக்கை எடுக்க வேண்டும் என விவசாயிகள் கோரிக்கை விடுத்தனர்.
செங்கம் ஊராட்சி ஒன்றிய அலுவலக வளாகத்தில் விவசாயிகள் குறைதீர் கூட்டம் மாவட்ட ஆட்சியரின் நேர்முக உதவியாளர் கிருஷ்ணமூர்த்தி தலைமையில் செவ்வாய்க்கிழமை நடைபெற்றது.
கூட்டத்தில் விவசாயிகள் கலந்துகொண்டு பேசியதாவது: செங்கம் பகுதியில் மாடுகளுக்கு நோய்கள் பரவி உயிரிழந்து வருவதால், இந்தப் பகுதியில் கால்நடைத் துறையினர் முகாம் நடத்த நடவடிக்கை எடுக்க வேண்டும்.
செங்கம் பகுதியில் மணல், மண் கடத்தலில் ஈடுபடுபவர்கள் மீது நடவடிக்கை எடுக்க வேண்டும். கொட்டகுளம் கிராமத்தில் உள்ள ஏரிகளின் மதகுகளை சீரமைக்க வேண்டும். தீத்தாண்டப்பட்டு அரசுப் பள்ளி மாணவர்களுக்கு குடிநீர் வசதி ஏற்பாடு செய்ய வேண்டும். அந்தப் பகுதியிலுள்ள ஆதிதிராவிட மக்களின் சுடுகாட்டுப் பாதையை சீரமைக்க வேண்டும்.
காஞ்சி, கடலாடி பகுதிகளில் பேருந்து நிறுத்தத்தில் உள்ள ஆக்கிரமிப்புகளை அகற்ற வேண்டும். செங்கம் பேரூராட்சிக்கு நிரத்தர செயல் அலுவலரை நியமிக்க வேண்டும் என்பன உள்ளிட்ட கோரிக்கைகளை வலியுறுத்திப் பேசினர். கூட்டத்தில், அனைத்துத் துறை அலுவலர்கள், விவசாயிகள், பொதுமக்கள் பலர் கலந்து கொண்டனர்.