சிறுமிக்கு திருமணம்: அதிகாரிகள் வருவதை அறிந்து கல்யாண வீட்டார் தப்பியோட்டம்

வாணியம்பாடி அருகே பிளஸ் 2 மாணவிக்கு நடக்கவிருந்த திருமணத்தைத் தடுத்து நிறுத்த அதிகாரிகள் வருவதை அறிந்து, திருமணத்தை நிறுத்திவிட்டு மணமக்கள் வீட்டார் தப்பியோடினர்.
வாணியம்பாடியை அடுத்த மதனஞ்சேரி கிராமத்தைச் சேர்ந்த 16 வயதே ஆன பிளஸ் 2 மாணவிக்கும், அதே பகுதியைச் சேர்ந்த சுதாகாருக்கும் (24) திருமணம் செய்து வைக்க இரு வீட்டாரும் முடிவு செய்தனர். மதனாஞ்சேரியில் உள்ள தனியார் மண்டபத்தில் புதன்கிழமை காலை 6 மணி முதல் 7.30 மணிக்குள் திருமணம் நடத்த ஏற்பாடுகள் செய்தனர். 
இந்நிலையில், 18 வயது பூர்த்தியடையாத சிறுமிக்கு திருமணம் நடத்தி வைக்க ஏற்பாடுகள் நடைபெறுவதாக ஆட்சியர் மற்றும் சமூகப் பாதுகாப்புத் துறை அதிகாரிகளுக்கு செவ்வாய்க்கிழமை இரவு தகவல் கிடைத்தது.
இதையடுத்து புதன்கிழமை அதிகாலை சமூகப் பாதுகாப்பு நலத் துறை அதிகாரிகள், வருவாய்த் துறை அதிகாரிகள், வாணியம்பாடி கிராமியக் காவல் ஆய்வாளர் சுரேஷ் மற்றும் போலீஸார் திருமண மண்டபத்துக்குச் சென்றனர். 
அப்போது, மண்டபத்தில் ஒருவர் கூட இல்லை. தோரணங்கள் கட்டப்பட்டு மணவறை தயார் நிலையில் இருந்தது. திருமணத்தைத் தடுத்து நிறுத்த அதிகாரிகள் வருவதை அறிந்து, திருமணத்தை நிறுத்திவிட்டு மணமக்கள், இரு வீட்டாரும் ஒட்டு மொத்தமாக தப்பியோடியது தெரியவந்தது. 
இதுதொடர்பாக, மணமக்களின் பெற்றோர் மற்றும் உறவினர்களிடம் அதிகாரிகள் விசாரணை நடத்தி வருகின்றனர்.