உடல் உறுப்பு தானம் மூலமாகப் பிறரை  வாழ வைப்பவர்கள் கடவுளின் தூதர்கள்

உடல் உறுப்பு தானம் மூலமாகப் பிறரை வாழ வைப்பவர்கள் கடவுளின் தூதர்களாகத் திகழ்வதாக சுகிசிவம் தெரிவித்தார். 
 கோவை, கிக்கானி மேல்நிலைப் பள்ளியில் இந்தியத் தொழில் கூட்டமைப்பு, யங் இந்தியன் மற்றும் பல்வேறு தனியார் மருத்துவமனைகள் சார்பில் ஞாயிற்றுக்கிழமை நடைபெற்ற உடல் உறுப்பு தான விழிப்புணர்வு நிகழ்ச்சியில் "கொடுத்ததெல்லாம் கொடுத்தான்' எனும் தலைப்பில் சுகிசிவம் பேசியதாவது:
 மனித குலத்தில் மனிதர்களுக்கு இருக்கும் எதிர்ப்பார்ப்புகள் எல்லையற்றவை. இம் மனிதர்களைத் திருப்தி கொள்ளச் செய்வது என்பது முடியாத காரியம். எனவே, தானம் மூலமாக குறிப்பாக உடல் உறுப்பு தானம் மூலமாகப் பிறரை வாழ வைப்பவர்கள் கடவுளின் தூதர்களாகத் திகழ்கின்றனர். ஒருவர் இறந்த பின்னர் அவரது உடல் உறுப்புகளை தானமாகக் கொடுப்பதால் எந்த இழப்பும் ஏற்படப்போவதில்லை. இது மனித குலத்தின் கடமை. 
அதே நேரத்தில் உடல் உறுப்புகளை தானமாக வழங்குவது சமயத்துக்கு எதிரானது எனும் கூற்றை ஏற்க முடியாது. சிவபெருமானுக்கே கண்ணப்பனார் கண் தானம் வழங்கியதாக இலக்கியத்தில் குறிப்பிடப்பட்டுள்ளது.
 இறைவனுக்காக கோயில் கட்டுவதைவிட உடல் உறுப்பு தானம் செய்வது பல புண்ணியங்களை நமக்கு கொடுக்கும் என்றார்.
 இந்நிகழ்ச்சியில் உடல் உறுப்பு தானம் தொடர்பாகப் பல்வேறு விழிப்புணர்வு நடவடிக்கைகள் மேற்கொண்ட தனியார் மருத்துவமனை மருத்துவர்கள், நிர்வாகிகள் கௌரவிக்கப்பட்டனர். 
இதில், தமிழக அரசின் உடல் உறுப்புதான ஆணையத்தின் உறுப்பினர் செயலர் காந்திமதி, இந்தியத் தொழில் கூட்டமைப்பின் தலைவர் ரமேஷ், கூட்டமைப்பின் மருத்துவப் பிரிவு ஒருங்கிணைப்பாளர் டாக்டர் ஆர்.வி.ரமணி, யங் இந்தியன் அமைப்பின் தலைவர் திபேந்தர் சிங் உள்ளிட்ட பலர் கலந்துகொண்டனர்.