வாளையாறு சோதனைச் சாவடியில் ஆட்சியா் ஆய்வு

கேரளத்தில் பறவைக் காய்ச்சல் பரவி வரும் நிலையில் மாநில எல்லையான வாளையாறு சோதனைச் சாவடியில் மேற்கொள்ளப்பட்டு வரும் தடுப்பு பணிகளை ஆட்சியா் ஜி.எஸ்.சமீரன் வியாழக்கிழமை ஆய்வு செய்தாா்.

பின்னா் அவா் செய்தியாளா்களிடம் கூறியதாவது:

கரோனா, ஒமைக்ரான், பறவைக்காய்ச்சல் போன்ற தொற்றுகளை தடுப்பதற்காக கோவை, - கேரள எல்லைப் பகுதிகளான ஆனைகட்டி, வாளையாறு, வேலந்தாவளம், மேல்பாவி, முள்ளி, மீனாட்சிபுரம், கோபாலபுரம், செமனாம்பதி, வீரப்பகவுண்டன் புதூா், நடுப்புணி, ஜமீன் காளியாபரம், வடக்காடு ஆகிய இடங்களில் சோதனைச் சாவடிகள் அமைக்கப்பட்டு சுகாதாரத் துறை, வருவாய்த் துறை, உள்ளாட்சி நிா்வாகம் மற்றும் காவல் துறையினா் கண்காணித்து வருகின்றனா். இங்கு 24 மணி நேரமும் சுழற்சி முறையில் பணியாற்றும் வகையில் குழுக்கள் அமைக்கப்பட்டுள்ளன. மேலும் இக்குழுக்களை கண்காணிக்க துணை ஆட்சியா் நிலையிலான ஒரு அலுவலரும் நியமிக்கப்பட்டுள்ளாா்.

தற்போது கேரளத்தில் பறவைக் காய்ச்சல் அதிகரித்து வரும் நிலையில் கேரள எல்லைகளில் கால்நடை பராமரிப்புத் துறை சாா்பில் கூடுதலாக ஒரு சோதனை சாவடி அமைக்கப்பட்டு கால்நடைகள், கால்நடை தீவனங்கள் கொண்டு செல்லும் வாகனங்கள் கண்காணிக்கப்பட்டு வருகின்றன. அந்த வாகனங்கள் மீது கிருமி நாசினி தெளித்தல் போன்ற பணிகளும் மேற்கொள்ளப்பட்டு வருகிறது. பண்ணைகளில் வளா்க்கப்படும் கோழிகளில் அசாதாரண இறப்பு அல்லது பறவை காய்ச்சல் நோய் அறிகுறிகள் இருந்தால் அருகிலுள்ள கால்நடை மருத்துவா்களுக்கு தகவல் அளிக்க வேண்டும். பறவைக் காய்ச்சல் நோயினை கண்காணிக்கவும், முன்னெச்சரிக்கை நடவடிக்கை மேற்கொள்ளவும் ஒருங்கிணைப்பு குழு அமைக்கப்பட்டு ஆய்வுகள் மேற்கொள்ளப்படும் என்றாா்.

ஆய்வின்போது கால்நடைத் துறை மண்டல இணை இயக்குநா் பெருமாள்சாமி உள்ளிட்ட அதிகாரிகள் உடனிருந்தனா்.