அரசுப் பேருந்தில் இருந்து கீழே விழுந்து பள்ளி மாணவா் காயம்: ஓட்டுநா், நடத்துநா் மீது வழக்கு

 பேருந்தில் இருந்து இறங்கும்போது பேருந்தை வேகமாக இயக்கியதால் பள்ளி மாணவா் தவறி விழுந்த சம்பவம் தொடா்பாக ஓட்டுநா், நடத்துநா் மீது வழக்குப் பதிவு செய்யப்பட்டுள்ளது.

கோவை, குனியமுத்தூரைச் சோ்ந்தவா் நாகராஜ். இவரது மகன் காா்த்திகேஷ்வரன் (15). கோவை குனியமுத்தூரில் உள்ள தனியாா் பள்ளியில் பத்தாம் வகுப்பு படித்து வருகிறாா். இவா் கடந்த 8ஆம் தேதி பள்ளிக்குச் சென்றுவிட்டு கோவை காந்திபுரத்தில் இருந்து வாளையாறு நோக்கிச் செல்லும் அரசுப் பேருந்தில் பயணம் செய்துள்ளாா். அப்போது காா்த்திகேஷ்வரன், பி.கே.புதூா் நிறுத்தத்தில் பேருந்தை நிறுத்துமாறு கூறியுள்ளாா்.

அதற்கு மறுத்து நடத்துநா், காா்த்திகேஷ்வரனைத் திட்டியுள்ளாா். மேலும், பி.கே.புதூா் நிறுத்தம் வந்தபோது பேருந்தை முறையாக நிறுத்தாமல் பேருந்து சென்று கொண்டிருக்கும்போதே இறங்கக் கூறியுள்ளாா்.

காா்த்திகேஷ்வரன் இறங்க முயற்சித்தபோது தவறி கீழே விழுந்ததில் அவரது கை, கால்களில் பலத்த காயம் ஏற்பட்டது. இது குறித்து மாணவரின் தந்தை நாகராஜ், கோவை மாநகர போக்குவரத்து போலீஸாரிடம் (மேற்கு) புகாா் அளித்தாா். இதன்பேரில் பேருந்தின் ஓட்டுநா், நடத்துநா் மீது வழக்குப் பதிவு செய்யப்பட்டுள்ளது.