தண்டுவடம் பாதிக்கப்பட்டவா்களுக்கு சிகிச்சை அளிக்க ரூ.40 லட்சம் நன்கொடை வழங்கிய மூதாட்டி

கோவையில் முதுகுத் தண்டுவடம் பாதிக்கப்பட்ட நோயாளிகளுக்கு சிகிச்சை அளிப்பதற்காக மூதாட்டி ஒருவா் தனியாா் மருத்துவமனைக்கு ரூ.40 லட்சம் நன்கொடை வழங்கியுள்ளாா்.

கோவை நிா்மலா கல்லூரியில் பேராசிரியராகப் பணியாற்றி ஓய்வுபெற்றவா் கமலா (87). இவா் கடந்த ஓராண்டுக்கு முன்பு கீழே விழுந்ததில் இடுப்பு எலும்பு முறிவு ஏற்பட்டு கங்கா மருத்துவமனையில் சிகிச்சை பெற்று வருகிறாா். இந்நிலையில் இவா், கங்கா முதுகுத் தண்டுவட மறுவாழ்வு மையத்துக்கு ரூ.40 லட்சம் நன்கொடை வழங்கியுள்ளாா்.

கவுண்டம்பாளையத்தில் உள்ள கங்கா முதுகுத் தண்டுவட மறுவாழ்வு மையத்தில் புதன்கிழமை நடைபெற்ற நிகழ்ச்சியில், மையத்தின் இயக்குநா் ரமா ராஜசேகா், தமிழ்நாடு பவுண்டேஷன் தலைவா் ராஜரத்தினம் உள்ளிட்டோா் முன்னிலையில் கமலா ரூ.40 லட்சத்துக்கான காசோலையை மறுவாழ்வு மையத்தின் தலைவா் டாக்டா் ராஜசேகரிடம் வழங்கினாா்.

இது குறித்து கமலாவின் சகோதரரும், ரோட்டரி சங்க நிா்வாகியுமான ராஜகோபால் கூறும்போது, எனது சகோதரி கமலாவுக்கு கடந்த ஓராண்டுக்கு முன்பு இடுப்பு எலும்பு முறிவு ஏற்பட்டது. அவா் கங்கா மருத்துவமனையில் சோ்க்கப்பட்டு அறுவை சிகிச்சைக்குப் பிறகு குணமடைந்து வருகிறாா்.

இந்நிலையில், இந்த மருத்துவமனையில் முதுகுத் தண்டுவட நோயால் பாதிக்கப்படுபவா்களுக்காக மறுவாழ்வு மையம் செயல்படுவதையும், அங்கு ஏராளமானோருக்கு சிகிச்சை அளிப்பதுடன் நோயாளிகளின் பொருளாதார மேம்பாட்டுக்கான தொழில் பயிற்சிகள் அளிக்கப்படுவதையும் அறிந்துள்ளாா்.

இதையடுத்து அந்த மையத்துக்கு சிகிச்சைக்காக வரும் ஏழ்மை நிலையில் உள்ள நோயாளிகளுக்கு உதவும் பொருட்டு அவா் ரூ.40 லட்சம் நன்கொடை வழங்கியுள்ளாா் என்றாா்.