ஈரோட்டில் புதிய குளம் அமைக்கும் பணி துவக்கம்

ஊருக்கு ஒரு குளம் திட்டத்தின்கீழ் ரூ10 லட்சம் ரூபாய் மதிப்பீட்டில் ஒளிரும் ஈரோடு பவுண்டேஷன்  புதிய குளம் அமைக்கும் பணிகள்  துவங்கியது.

ஈரோட்டில்  47 ஆவது நீர்நிலையாக காசிபாளையம் கண்ணகி நகர் மகாராஜா திரையரங்கம் பின்புறம், அருள்மிகு அங்காள பரமேஸ்வரி திருக்கோவில் அருகில் அமைந்துள்ள கசிவுநீர் ஓடை புறம்போக்கில் ரூ10 லட்சம் ரூபாய் மதிப்பீட்டில் ஒளிரும் ஈரோடு பவுண்டேஷன் என்ற தொண்டு நிறுவனம் சார்பில் பூஜையுடன் குளம் அமைக்கும் பணிகள் துவங்கப்பட்டன.

நிகழ்ச்சிக்கு மாவட்ட கலெக்டர் சி,கதிரவன் தலைமை தாங்கினார். ஈரோடு  கிழக்கு சட்டமன்ற உறுப்பினர்கள் தென்னரசு, மேற்கு சட்டமன்ற உறுப்பினர்    கே.வி.ராமலிங்கம் ஆகியோர் முன்னிலை வகித்தனர். ஒளிரும் ஈரோடு ஃபவுண்டேஷனின் தலைவர் சின்னசாமி வரவேற்புரை வழங்கினர். ஒளிரும் ஈரோடு ஃபவுண்டேஷனின் நீர் மேலாண்மை குழுத்தலைவர் ராபின் திட்ட விளக்கவுரை ஆற்றினார்.    

இவ்விழாவில்  பகுதி கழக செயலாளர்கள் கேசவமூர்த்தி, ஜெகதீஸ், தங்கதுரை, ஆவின் துணை தலைவர் குணசேகரன்,  அரசு அலுவலர்கள்  மற்றும் ஊர் பொது மக்கள் ஆகியோர் கலந்து கொண்டனர்.   இந்நிகழ்ச்சியில் பேசிய  நிறுவனத்தின் தலைவர் சின்னசாமி, “தற்போது தமிழக அரசு நீர் மேலாண்மைக்கு மிகவும் முக்கியத்துவம் அளித்து வருகிறது. இது போன்ற பணிகளை அரசு மட்டுமே செய்ய வேண்டும் என எதிர்பார்க்காமல் பொது மக்கள், தொண்டு நிறுவனங்கள், சமூக அமைப்பினர் என அனைவரும் பங்களிப்புடன் சேர்ந்து செய்வதன் மூலம் பணி எளிதில் முடிவடையும். இதனை கருத்தில் கொண்டு எங்கள் தொண்டு நிறுவனத்தின் மூலம் நீர்நிலை பாதுகாத்தல், நீர்நிலைகளில் மக்கள் பயன்பாட்டுக்குக் கொண்டு வருதல் போன்ற பணிகளை தொடர்ந்து செய்து வருகிறோம்.

இதுவரை 46 குளம், குட்டை, ஏரி, ஓடை, கால்வாய் மற்றும் தடுப்பணை போன்ற நீர்நிலைகளை சுத்தம் செய்தும் தூர்வாரி ஆழப்படுத்தி நீர் சேமிக்க வழி செய்துள்ளோம். அதன் தொடர்ச்சியாக இது 47வது நீர் நிலை மேம்பாடு ஆகும். இது அரசிடம் முறையாக அனுமதி பெற்று செய்யப்படுகின்றது இதற்கு தேவையான நிதிகள் எங்களது பங்களிப்பு மட்டுமின்றி இந்த ஊர் பொது மக்களின் பங்களிப்பு இருந்தால் சிறப்பாக இருக்கும் எனத் தெரிவித்தார்.