லஞ்சம்: கைது செய்யப்பட்ட விஏஓ சிறையில் அடைப்பு

சிட்டாவில் பெயா் சோ்க்க ரூ. 4 ஆயிரம் லஞ்சம் வாங்கியதாக பெண் கிராம நிா்வாக அலுவலா், அவரது உதவியாளா் ஆகியோா் கைது செய்யப்பட்டனா்.

நீலகிரி மாவட்டம், கரியமலை கிராமத்தைச் சோ்ந்தவா் சுந்தர்ராஜன். இவா் தனது உறவினா் அருண் என்பவருக்காக சிட்டாவில் பெயா் சோ்க்க வேண்டி குந்தா தாலுகா அலுவலகத்தில் விண்ணப்பித்திருந்தாா். இந்நிலையில், கிராம நிா்வாக அலுவலா் லதா, அருணின் பெயரை சிட்டாவில் சோ்க்க குறிப்பிட்ட தொகையை லஞ்சமாக கேட்டதாகக் கூறப்படுகிறது. இறுதியில் ரூ. 4,000 கொடுத்தால் சிட்டாவில் பெயா் சோ்ப்பதாக சுந்தர்ராஜனிடம் கிராம நிா்வாக அலுவலா் லதா கூறியுள்ளாா்.

சிட்டாவில் பெயா் சோ்க்க வேண்டி ஏற்கெனவே மாதக் கணக்கில் அலைந்ததால் அதிருப்தியில் இருந்த சுந்தர்ராஜன் இதுகுறித்து உதகை லஞ்ச ஒழிப்பு துறையினருக்குத் தகவல் கொடுத்துள்ளாா். இதைத்தொடா்ந்து, லஞ்ச ஒழிப்புத் துறை போலீஸாரின் ஆலோசனையின்படி பணம் கொடுப்பதற்காக சுந்தர்ராஜன், குந்தா வட்டாட்சியா் அலுவலகத்துக்கு வியாழக்கிழமை சென்றுள்ளாா். அப்போது, அங்கிருந்த கிராம நிா்வாக அலுவலா் லதா, அந்தப் பணத்தை கண்ணன் என்பவரிடம் கொடுத்துச் செல்லுமாறு கூறியதைத் தொடா்ந்து, சுந்தர்ராஜன் அலுவலகத்துக்கு வெளியில் ஜீப்பில் அமா்ந்திருந்த கண்ணன் என்பவரிடம் ரூ. 4 ஆயிரத்தைக் கொடுத்துள்ளாா்.

அப்போது, மறைந்திருந்த லஞ்ச ஒழிப்புத் துறை ஆய்வாளா் கீதாலட்சுமி தலைமையிலான போலீஸாா் கண்ணனைப் பிடித்தனா். தொடா்ந்து, தாலுகா அலுவலகத்துக்குள் அழைத்துச் சென்ற போலீஸாா் கண்ணனிடம் விசாரித்தனா். இதில், கிராம நிா்வாக அலுவலா் லதாவிடம் கொடுப்பதற்காகத்தான் சுந்தர்ராஜனிடம் இருந்து பணத்தைப் பெற்றதாகக் கண்ணன் கூறியுள்ளாா். இதைத் தொடா்ந்து கிராம நிா்வாக அலுவலா் லதாவிடமும் போலீஸாா் விசாரணை நடத்தினா்.

ஏற்கெனவே லஞ்சம் கொடுப்பது தொடா்பாக கிராம நிா்வாக அலுவலா் லதா, சுந்தர்ராஜன் ஆகியோரிடையே நடைபெற்ற உரையாடல் அனைத்தும் தனது செல்லிடப்பேசியில் பதிவு செய்து வைத்திருந்ததை சுந்தர்ராஜன் போலீஸாரிடம் கொடுத்துள்ளாா். இதனடிப்படையில் வழக்குப் பதிவு செய்த போலீஸாா் கிராம நிா்வாக அலுவலா் லதா மற்றும் உடந்தையாக இருந்த கண்ணன் ஆகிய இருவரையும் கைது செய்து கோவை மத்திய சிறையில் அடைத்தனா்.