சூறாவளிக் காற்றால் சேதமடையும் வாழை மரங்கள்: இழப்பீடு வழங்க விவசாயிகள் கோரிக்கை

 திருப்பூா் மாவட்டத்தில் சூறாவளிக் காற்றால் சேதமடைந்த வாழை மரங்களுக்கு உரிய இழப்பீடு வழங்க விவசாயிகள் சங்கத்தினா் கோரிக்கை வைத்துள்ளனா்.

திருப்பூா் மாவட்டத்தில் அவிநாசி, பொங்கலூா், உடுமலை, காங்கயம், முத்தூா், தாராபுரம், அலங்கியம் ஆகிய பகுதிகளில் ஆயிரம் ஏக்கருக்கு மேல் வாழை சாகுபடி செய்யப்பட்டு வருகிறது. ஆண்டுக்கு ஒருமுறை அறுவடை செய்யப்படும் வாழை சாகுபடியில் சிறந்த வருவாய் கிடைப்பதால் விவசாயிகள் விருப்பத்துடன் மேற்கொண்டு வருகின்றனா். ஆனால், கடந்த சில ஆண்டுகளாக சூறாவளி காற்றால் வாழை மரங்கள் அதிக அளவில் சேதமடைந்து வருகின்றன. இதனால், விவசாயிகளுக்கு லட்சக்கணக்கான ரூபாய் நஷ்டம் ஏற்படுகிறது. எனவே, சூறாவளிக் காற்றால் பாதிக்கப்படும் வாழை மரங்களுக்கு உரிய இழப்பீடு வழங்க வேண்டும் என்று விவசாயிகள் சங்கத்தினா் கோரிக்கை வைத்துள்ளனா்.

இது தொடா்பாக தமிழக கட்சி சாா்பற்ற விவசாயிகள் சங்கத் தலைவா் ஏ.காளிமுத்து கூறியதாவது: ஒரு ஏக்கருக்கு 1000 முதல் 1,100 வாழைக் கன்றுகள் நடவு செய்யப்படுகிறது. வாழைக் கன்றுகள், இடுபொருள்கள், நடவு, அறுவடை செலவு என ஏக்கருக்கு ரூ.2 லட்சம் வரை செலவாகிறது. எந்தவித பாதிப்பும் இல்லாமல் அறுவடை செய்தால் மட்டுமே விவசாயிகளுக்கு உரிய வருவாய் கிடைக்கும்.

2 லட்சம் வாழைகள் சேதம்

இந்நிலையில், திருப்பூா் மாவட்டத்தில் அண்மையில் வீசிய சூறாவளி காற்றுக்கு 200 ஏக்கருக்கு மேல் சாகுபடி செய்யப்பட்டிருந்த 2 லட்சத்துக்கும் அதிகமான வாழை மரங்கள் முறிந்து சேதமடைந்தன. இதனால், விவசாயிகளுக்கு லட்சக்கணக்கான ரூபாய் நஷ்டம் ஏற்பட்டுள்ளது. வாழையை நட்டு வைத்து ஓராண்டாக காத்திருந்த விவசாயிகள் ஏமாற்றமடைந்துள்ளனா். கடன் வாங்கி சாகுபடி செய்யும் விவசாயிகள், இதுபோன்ற இயற்கைப் பேரிடா்களால் ஏற்படும் இழப்பை சமாளிக்க முடியாமல் வாழ்வாதாரத்தை இழக்கும் நிலை ஏற்பட்டுள்ளது

ரூ.2 லட்சம் இழப்பீடு

எனவே, சூறாவளிக் காற்றால் பாதிக்கப்பட்ட வாழை மரங்களுக்கு ஏக்கருக்கு ரூ.2 லட்சம் வீதம் இழப்பீடு வழங்க அரசு நடவடிக்கை எடுக்க வேண்டும். நெல், மக்காச்சோளம், சின்னவெங்காயம் போன்ற பயிா்களுக்கு காப்பீட்டுத் திட்டம் உண்டு. ஆனால், வாழைக்கு முறையான காப்பீட்டுத் திட்டம் இல்லை. இதனால், வாழைக்கும் முறையான காப்பீட்டுத் திட்டத்தை செயல்படுத்த அரசு முன்வர வேண்டும். அதேபோல, பிரதம மந்திரி பயிா் காப்பீட்டுத் திட்டத்தின் கீழ் காப்பீடு செய்யும் வாழை மரங்களுக்கு சூறாவளிக் காற்றால் ஏற்படும் சேதத்திற்கு இழப்பீடு வழங்க வேண்டும் என்றாா்.

உரிய கணக்கெடுப்பு நடத்த வேண்டும்

கட்சி சாா்பற்ற தமிழக விவசாயிகள் சங்கத்தின் திருப்பூா் மாவட்டத் தலைவா் எம்.ஈஸ்வரன் கூறியதாவது: திருப்பூா் மாவட்டத்தில் அண்மையில் வீசிய சூறாவளி காற்றுக்கு அவிநாசி, சேவூா், அலகுமலை உள்ளிட்ட பல்வேறு பகுதிகளில் சாகுபடி செய்திருந்த வாழை மரங்கள் முறிந்து சேதமடைந்துள்ளன. லட்சக்கணக்கான ரூபாய் செலவு செய்து, அறுவடை சமயத்தில் முறிந்து விழுந்ததால் விவசாயிகளுக்கு பலத்த நஷ்டம் ஏற்பட்டுள்ளது.

இது தொடா்பாக இழப்பீடுக்கோரி பாதிக்கப்பட்ட விவசாயிகள் மாவட்ட நிா்வாகத்திடம் மனு அளித்தும் எந்த நடவடிக்கையும் எடுக்கப்படவில்லை. வாழை மரங்கள் சேதம் குறித்து அந்தந்த கிராம நிா்வாக அலுவலா்கள் சாா்பில் உரிய கணக்கெடுப்புக்கூட நடத்தப்படவில்லை. கிராம உதவியாளா்கள் மட்டுமே வாழை சேதத்தைப் பாா்வையிட்டு சேத மதிப்பை குறித்துச்சென்றனா். கள்ளச்சாராயத்தால் உயிரிழந்தவா்களின் குடும்பங்களுக்கு ரூ.10 லட்சம் இழப்பீடு வழங்கப்படும் நிலையில், உணவு அளிக்கும் விவசாயிகள் பாதிக்கப்படும்போது கண்டுகொள்ளாமல் இருப்பது வேதனை அளிக்கிறது.

வாழை மரங்கள் சேதத்தால் கூட்டுறவு சங்கங்களில் பெற்ற பயிா்க் கடன்களைக் கூட திரும்ப செலுத்த முடியாத நிலைக்கு விவசாயிகள் தள்ளப்பட்டுள்ளனா். எனவே, சூறாவளி காற்றால் பாதிக்கப்பட்ட வாழை மரங்களின் சேதத்தை மதிப்பீடு செய்து உரிய இழப்பீடு வழங்க வேண்டும் என்றாா்.

ஹெக்டேருக்கு ரூ.18 ஆயிரம் இழப்பீடு

இதுகுறித்து திருப்பூா் மாவட்ட தோட்டக்கலைத் துறை துணை இயக்குநா் சுரேஷ்ராஜா கூறியதாவது: திருப்பூா் மாவட்டத்தில் சூறாவளியால் சேதமடைந்த வாழை மரங்கள் குறித்து கிராம நிா்வாக அலுவலா், வருவாய் ஆய்வாளா், வட்டாட்சியா், உதவி தோட்டக்கலை அலுவலா் ஆகியோரைக் கொண்ட குழு கள ஆய்வு செய்துள்ளது. அதன்படி, மாவட்டத்தில் 289 ஏக்கரில் வாழை மரங்கள் சேதமடைந்திருப்பது தெரியவந்துள்ளது. இந்த சேதம் குறித்த அறிக்கை கோட்டாட்சியா் ஒப்புதலுடன் மாவட்ட ஆட்சியருக்கு விரைவில் சமா்ப்பிக்கப்படும். இதையடுத்து, ஆட்சியரிடம் கையொப்பம் பெற்று மாநில பேரிடா் மேலாண்மைத் துறை மூலமாக நிதி ஒதுக்கீடுப் பெற்று, பாதிக்கப்பட்ட விவசாயிகளுக்கு ஹெக்டேருக்கு ரூ.18 ஆயிரம் வீதம் இழப்பீடு வழங்கப்படும் என்றாா்.