சமூக நீதிக்காகப் பாடுபட்டவா்கள் தந்தை பெரியாா் விருதுக்கு விண்ணப்பிக்கலாம்

திருப்பூா் மாவட்டத்தில் சமூக நீதிக்காகப் பாடுபட்டவா்கள் தந்தை பெரியாா் விருதுக்கு விண்ணப்பிக்கலாம் என்று மாவட்ட ஆட்சியா் தா.கிறிஸ்துராஜ் தெரிவித்துள்ளாா்.

இது தொடா்பாக அவா் வெளியிட்டுள்ள செய்திக் குறிப்பு: சமூக நீதிக்காகப் பாடுபடுபவா்களை சிறப்பு செய்வதற்காக ‘சமூக நீதிக்கான தந்தை பெரியாா் விருது’ கடந்த 1995 -ஆம் ஆண்டு முதல் வழங்கப்பட்டு வருகிறது. இந்த விருது பெறுபவா்களுக்கு ரூ.5 லட்சம் விருதுத் தொகை, ஒரு பவுன் தங்கப் பதக்கம், தகுதியுரை வழங்கப்படுகிறது. விருதாளா் தமிழக முதல்வரால் தோ்வு செய்யப்படுகிறாா்.

2024- ஆம் ஆண்டுக்கான தமிழக அரசின் ‘சமூக நீதிக்கான தந்தை பெரியாா் விருது’ வழங்குவதற்கு உரிய விருதாளரைத் தோ்வு செய்ய பரிந்துரைகள் வரவேற்கப்படுகின்றன. எனவே, சமூக நீதிக்காகப் பாடுபட்டு பொதுமக்களின் வாழ்க்கைத் தரத்தை மேம்படுத்த மேற்கொள்ளப்பட்ட பணிகள் மற்றும் அதன் பொருட்டு எய்திய சாதனைகள் ஆகிய தகுதிகள் உடையவா்கள் தங்களது விண்ணப்பத்தை மாவட்ட ஆட்சியருக்கு வரும் டிசம்பா் 20 -ஆம் தேதிக்குள் அனுப்ப வேண்டும்.

விண்ணப்பத்தில் சுய விவரம், முழுமுகவரி, தொலைபேசி எண், சமூக நீதிக்காக பாடுபட்ட பணிகள் குறித்த விவரம் மற்றும் ஆவணங்கள் உள்ளடங்கியதாக இருக்க வேண்டும்.

இது தொடா்பான கூடுதல் விவரங்களுக்கு மாவட்ட ஆட்சியா் அலுவலகத்தின் முதல் தளம் அறை எண் 115-இல் உள்ள மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலகத்தைத் தொடா்பு கொள்ளலாம் எனத் தெரிவிக்கப்பட்டுள்ளது.