நுகா்வு குறைவால் கறிக்கோழி உற்பத்தி 15 சதவீதம் குறைப்பு: பல்லடம் கறிக்கோழி ஒருங்கிணைப்பு குழு செயலாளா்

நுகா்வு குறைவால் கறிக்கோழி உற்பத்தி 15 சதவீதம் குறைக்கப்பட்டுள்ளது என்று கறிக்கோழி பல்லடம் கறிக்கோழி ஒருங்கிணைப்பு குழு செயலாளா் சுவாதி சின்னசாமி தெரிவித்துள்ளாா்.

பல்லடம் மற்றும் சுற்றுவட்டாரப் பகுதிகளில் 3 ஆயிரத்துக்கும் மேற்பட்ட கறிக்கோழி பண்ணைகள் உள்ளன. இவைகள் மூலம் நாள்தோறும் 10 லட்சம் கறிக்கோழிகள் உற்பத்தி செய்யப்பட்டு, தமிழகத்தின் பல்வேறு மாவட்டங்களுக்கும், கேரளம், ஆந்திரம், கா்நாடகம் உள்ளிட்ட மாநிலங்களுக்கும் அனுப்பிவைக்கப்படுகின்றன. கறிக்கோழி நுகா்வை பொறுத்து அதன் கொள்முதல் விலையை பல்லடத்தில் உள்ள கறிக்கோழி ஒருங்கிணைப்பு குழுவினா் நாள்தோறும் நிா்ணயம் செய்து அறிவிக்கின்றனா்.

இந்நிலையில், கேரளம், கா்நாடகம் உள்ளிட்ட மாநிலங்களில் பெய்து வரும் மழை மற்றும் புரட்டாசி மாதத்தில் கோழி இறைச்சி நுகா்வு குறைவு போன்ற காரணங்களால் கறிக்கோழி நுகா்வு குறைந்து பண்ணைகளில் கறிக்கோழிகள் தேக்கமடைந்ததால் உற்பத்தியை கோழிப்பண்ணையாளா்கள் 15 சதவீதம் குறைத்துள்ளனா்.

இது குறித்து கறிக்கோழி ஒருங்கிணைப்பு குழு செயலாளா் சுவாதி சின்னசாமி கூறியதாவது: புரட்டாசி மாதத்தில் பெரும்பாலான ஹிந்துகள் விரதம் மேற்கொள்வதால், கோழி இறைச்சி நுகா்வு குறைந்து பண்ணைகளில் கறிக்கோழி தேக்கம் அடைந்து வருகிறது.

இது குறித்து கறிக்கோழி உற்பத்தியாளா்கள் குழு கூட்டத்தில் ஆலோசனை நடத்தப்பட்டு கறிக்கோழி உற்பத்தியை 15 சதவீதம் குறைக்க முடிவு செய்து அதற்கான நடவடிக்கை எடுக்கப்பட்டுள்ளது. தற்போதைய நுகா்வுக்கு ஏற்ப சந்தையில் கறிக்கோழி விற்பனைக்கு கிடைத்து வருகிறது. தேவை அதிகரிக்கும்போது கறிக்கோழி உற்பத்தியையும் அதிகரிப்போம். புதன்கிழமை கொள்முதல் விலை ரூ. 104-ஆக உள்ளது. கோழி தீவனங்கள் அதிக அளவு ஏற்றுமதி செய்யப்படுவதால் அவற்றின் விலையும் உள்நாட்டில் அதிகரிக்கிறது. எனவே, தீவன ஏற்றுமதியை கட்டுப்படுத்த வேண்டும். மக்காச்சோளம், சோயா போன்றவற்றை தமிழ்நாட்டில் அதிக அளவில் உற்பத்தி செய்ய தமிழக அரசு நடவடிக்கை எடுக்க வேண்டும் என்றாா்.