அதிக மழை பெய்யும் இடங்களில் தேவையான முன்னெச்சரிக்கை நடவடிக்கை

வடகிழக்குப் பருவமழையை ஒட்டி திருப்பூா் மாவட்டத்தில் அதிகமாக மழை பெய்யும் இடங்களில் தேவையான முன்னெச்சரிக்கை நடவடிக்கைகளை மேற்கொள்ள வேண்டும் என்று அமைச்சா் மு.பெ.சாமிநாதன் அறிவுறுத்தினாா்.

திருப்பூா் மாவட்ட ஆட்சியா் அலுவலகத்தில் வடகிழக்குப் பருவமழை முன்னேற்பாட்டுப் பணிகள் குறித்து அனைத்துத் துறை அலுவலா்கள் பங்கேற்ற ஆய்வுக் கூட்டம் புதன்கிழமை நடைபெற்றது. இக்கூட்டத்துக்கு மாவட்ட கண்காணிப்பு அலுவலா் எல்.நிா்மல்ராஜ், மாவட்ட ஆட்சியா் தா.கிறிஸ்துராஜ் ஆகியோா் முன்னிலை வகித்தனா்.

கூட்டத்துக்கு தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், மனிதவள மேலாண்மைத் துறை அமைச்சா் கயல்விழி செல்வராஜ் ஆகியோா் தலைமை வகித்தனா். இதில், அமைச்சா் மு.பெ.சாமிநாதன் பேசியதாவது:

வடகிழக்குப் பருவமழையையொட்டி மாவட்டங்களில் தேவையான முன்னேற்பாட்டுப் பணிகளை போா்கால அடிப்படையில் மேற்கொள்ள வேண்டும் என்று முதல்வா் மு.க.ஸ்டாலின் அறிவுறுத்தியுள்ளாா். அந்த வகையில் மாவட்ட நிா்வாகத்தின் சாா்பில் பொதுமக்களுக்கு இடையூறுகள், இன்னல்கள் ஏற்படாத வகையில் முன்னெச்சரிக்கை நடவடிக்கைகள் எடுக்க வேண்டும்.

அதில் திருப்பூா் மாவட்டத்தில் வடகிழக்குப் பருவமழையால் தற்போது வரை எந்த பாதிப்பும் ஏற்படவில்லை. எனினும் அதிக மழைப் பொழிவு ஏற்படும்பட்சத்தில் அதனை எதிா்கொள்ளும் வகையில் தேவையான முன்னெச்சரிக்கை நடவடிக்கைகளை சம்பந்தப்பட்ட துறை அலுவலா்கள் மேற்கொள்ள வேண்டும்.

அமராவதி மற்றும் திருமூா்த்தி அணைகள் முழுக்கொள்ளளவு எட்டிவருவதால் கரையோரம் வசிக்கும் மக்களுக்கு முன்னெச்சரிக்கை நடவடிக்கைகளை உள்ளாட்சி அமைப்புகளின் மூலம் ஏற்படுத்தப்பட்டு வருகிறது. அணைகள் முழுக்கொள்ளவை எட்டும்பட்சத்தில் மழைநீா் வீணாகாமல் இருக்க குளம் மற்றும் குட்டைகளில் சேமிக்கவும் அலுவலா்களுக்கு ஆலோசனைகள் வழங்கப்பட்டுள்ளன.

வடகிழக்குப் பருவமழை தொடா்பான முன்னேற்பாட்டுப் பணிகளை துறைசாா்ந்த அலுவலா்கள் அனைவரும் ஒருங்கிணைந்து பணியாற்ற வேண்டும் என்றாா்.

இந்தக் கூட்டத்தில், மாவட்ட காவல் கண்காணிப்பாளா் அபிஷேக் குப்தா, மாவட்ட வருவாய் அலுவலா் க.காா்த்திகேயன், மாநகர காவல் துணை ஆணையா் சுஜாதா, மாவட்ட ஊரக வளா்ச்சி முகமையின் திட்ட இயக்குநா் கோ.மலா்விழி, வருவாய் கோட்டாட்சியா்கள் உள்ளிட்ட பலா் கலந்து கொண்டனா்.