மருத்துவ அறக்கட்டளை தொடங்குவதாக ரூ.10 கோடி நிலம், ரூ. 2.25 கோடி மோசடி! நடவடிக்கை எடுக்க வலியுறுத்தல்!

மருத்துவ அறக்கட்டளை தொடங்குவதாகக் கூறி, ரூ. 10 கோடி மதிப்பிலான நிலம் மற்றும் ரூ. 2.25 கோடி ரொக்கம் மோசடி செய்த மருத்துவ தம்பதி மீது நடவடிக்கை எடுக்க வேண்டும் என பாதிக்கப்பட்டவா்கள் வலியுறுத்தி உள்ளனா்.

திருப்பூா் லிங்கே கவுண்டா் வீதியைச் சோ்ந்தவா் ராஜேந்திரன் (87). பிரிண்டிங் பிரஸ் வைத்துள்ளாா். இவரது மகள் இறந்த நிலையில், அவரது இறுதி ஆசையான மருத்துவ அறக்கட்டளை தொடங்க, தனக்கு அறிமுகமான மருத்துவ தம்பதியை ராஜேந்திரன் அணுகினாா்.

அந்த தம்பதி, ஏற்கெனவே மருத்துவ அறக்கட்டளை நடத்தி வருவதாக கூறியதால், ராஜேந்திரன் தனக்கு சொந்தமான காதா்பேட்டை பகுதியில் உள்ள ரூ. 10 கோடி மதிப்பிலான 7 சென்ட் இடம் மற்றும் அங்கு கட்டடம் கட்டுவதற்கு பல்வேறு வகையில் ரூ. 2.25 கோடி கொடுத்து உதவினாராம்.

ஆனால் அறக்கட்டளையில் ராஜேந்திரன் உள்ளிட்ட உறவினா்களை சோ்க்காமல் காலம்தாழ்த்தி வந்துள்ளனா். இதையடுத்து ராஜேந்திரன் திருப்பூா் மாவட்ட ஆட்சியா், மாநகர காவல் ஆணையரிடம் புகாா் அளித்தாா். இது தொடா்பாக போலீஸாா் தரப்பில் வழக்குப் பதிவு செய்யப்பட்டது. மேலும் இந்திய மருத்துவ சங்கத்தில் ராஜேந்திரன் அளித்த புகாரின் அடிப்படையில், 4 போ் கொண்ட குழு அமைக்கப்பட்டு விசாரணை நடைபெற்று வருகிறது.

இந்நிலையில் பாதிக்கப்பட்ட ராஜேந்திரன், பானுமதி ஆகியோா் செய்தியாளா்களிடம் சனிக்கிழமை கூறியதாவது: திருப்பூரைச் சோ்ந்த மருத்துவ தம்பதியான செந்தில்குமாா், சங்கீதா எங்களை நம்பவைத்து, சொத்தை அபகரிக்கும் நோக்கில் செயல்பட்டுள்ளனா்.

இது தொடா்பாக போலீஸாா் வழக்குப் பதிந்துள்ளனா். இந்நிலையில் எங்கள் உயிருக்கு பாதுகாப்பு இல்லாத சூழல் உள்ளது. ஆகவே பாதுகாப்பு வழங்க வேண்டும். மகளின் கடைசி ஆசையை நிறைவேற்ற, அறக்கட்டளை அமைத்து மக்களுக்கு மருத்துவ உதவி வழங்க வேண்டும். எங்களிடம் இருந்து முறைகேடாக அபகரித்த சொத்தை மீட்டுத்தர வேண்டும் என்றனா்.