‘என் ஊா் - என் கனவு’ திட்டம்: செயல் திட்டம் தயாரிப்பதற்கான கலந்தாய்வுக் கூட்டம்

திருப்பூா்: ‘என் ஊா்-என் கனவு’ திட்டத்தின்கீழ் உத்திகள் மற்றும் செயல் திட்டம் தயாரிப்பதற்கான மாவட்ட அளவிலான கலந்தாய்வுக் கூட்டம் ஊத்துக்குளி வட்டம், செங்கப்பள்ளியில் திங்கள்கிழமை நடைபெற்றது.

இந்தக் கூட்டத்துக்கு, தமிழ் வளா்ச்சி மற்றும் செய்தித் துறை அமைச்சா் மு.பெ.சாமிநாதன், மனிதவள மேலாண்மைத் துறை அமைச்சா் என்.கயல்விழி செல்வராஜ் ஆகியோா் தலைமை

வகித்தனா். மாவட்ட ஆட்சியா் மனீஷ், மேயா் ந.தினேஷ்குமாா் ஆகியோா் முன்னிலை வகித்தனா்.

இக்கூட்டத்தில் அமைச்சா் மு.பெ.சாமிநாதன் பேசியதாவது:

‘என் ஊா்-என் கனவு’ திட்டத்தில் பொதுமக்களின் எண்ணங்கள் எதிா்காலத்தில் செயல் வடிவம் பெற வேண்டும்.

மக்களுடைய வாழ்க்கைத்தரம் மேம்படுவதற்கும், மக்களுக்குப் பயனுள்ள திட்டங்கள் நிறைவேற வேண்டும் என்ற அடிப்படையில் இத்திட்டம் கொண்டுவரப்பட்டுள்ளது.

இதன் மூலம் பொதுமக்கள் தங்கள் பகுதியில் உள்ள கோரிக்கைகளை அரசின் கவனத்துக்கு கொண்டு வரும் போது அவை படிப்படியாக நிறைவேற்றப்படும்.

மக்களின் தேவைகளை தெரிந்து கொண்டு நிதிநிலைமைக்கு ஏற்ப செயல்படுத்துவதற்கு எளிதாக தொலைநோக்குப் பாா்வையோடு இத்திட்டம் உருவாக்கப்பட்டுள்ளது.

ஒவ்வொரு கிராமத்தின் அடிப்படை வசதிகளை மேம்படுத்தவும், சுற்றுச்சூழலைப் பாதுகாக்கவும், மக்களுடைய திட்டங்களை உருவாக்குவதே இத்திட்டத்தின் நோக்கம்.

உடுமலைப்பேட்டையில் நடைபெற்ற நிகழ்ச்சியில் முதல்வா் மு.க.ஸ்டாலின், வெண்ணெயிலிருந்து பல்வேறு மூலப்பொருள்களைத் தயாரிப்பதற்கான சூழலை உருவாக்குவதற்கு நெய் தரம் பிரித்து எடுப்பதற்காக ஆவின் நிறுவனம் மூலம் தொழிற்சாலை நிறுவப்படும் என அறிவித்தாா். அந்தத் தொழிற்சாலை ஊத்துக்குளி ஒன்றியத்தில் தொடங்கப்படும் என்றாா்.

அமைச்சா் என்.கயல்விழி செல்வராஜ் பேசியதாவது: ஒவ்வொரு துறை சாா்பாக இலக்கு நிா்ணயித்துக் அதை சிறப்பாக அடுத்த 5 ஆண்டுகளுக்கு எப்படி செயல்படுத்த வேண்டும் கலந்தாய்வு செய்துள்ளோம்.

திருப்பூா் மாவட்டத்தில் அனைத்து திட்டங்களும் முன்னுரிமை அடிப்படையில் செயல்படுத்தப்பட்டு வருகின்றன. மாவட்டத்தில் இலவச வீட்டு மனை பட்டா, சாலை, குடிநீா் வசதி, தொழில் தொடங்குவதற்கு கடனுதவி என நிறைய தேவைகள் இருக்கின்றன. துறை சாா்ந்த அலுவலா்கள் ஏற்கெனவே இருக்கக்கூடிய திட்டங்களைப் பற்றி பொதுமக்களிடம் எடுத்துக் கூறுவதுடன் அவா்களையும் கேட்டறிந்து அரசு திட்டங்களை கிராமங்கள் முழுமையாக பயன்படுத்த முயற்சிக்க வேண்டும் என்றாா்.

தொடா்ந்து, இத்திட்டத்தின் கீழ் உத்திகள் மற்றும் செயல் திட்டம் தயாரிப்பதற்கான பல்வேறு துறை சாா்ந்த வல்லுநா்கள் கருத்துகளைத் தெரிவித்தனா்.

இதில், மாவட்ட வருவாய் அலுவலா் க.காா்த்திகேயன், மாவட்ட ஊரக வளா்ச்சி முகமை திட்ட இயக்குநா் க.சங்கமித்திரை, முன்னாள் அமைச்சா் தோப்பு என்.டி.வெங்கடாசலம், மகளிா் திட்ட அலுவலா் ஈஸ்வரன், திருப்பூா் வருவாய் கோட்டாட்சியா் சிவபிரகாஷ், ஊராட்சிகளின் உதவி இயக்குநா்சதீஷ்குமாா் மற்றும் துறை சாா்ந்த அலுவலா்கள் கலந்து கொண்டனா்.