தருமபுரி சாதனை விவசாயிக்கு புதுச்சேரி அமைச்சர் பாராட்டு

தருமபுரியில் விருது பெற்ற சாதனை விவசாயியை, புதுச்சேரி வேளாண் துறை அமைச்சர் இரா.கமலக்கண்ணன் வியாழக்கிழமை நேரில் சந்தித்து பாராட்டு தெரிவித்தார்.
தருமபுரி அருகே குள்ளனூரைச் சேர்ந்தவர் விவசாயி முனுசாமி. இவர், கடந்தாண்டு ஒரு ஹெக்டேர் நிலத்தில் பழைய மற்றும் புதிய தொழில்நுட்ப முறைகளைப் பின்பற்றி, 19 ஆயிரத்து 125 கிலோ நெல் அறுவடை செய்து சாதனை படைத்தார்.
இவரை சிறந்த விவசாயியாகத் தேர்ந்தெடுத்து தமிழக அரசு பதக்கம் மற்றும் பரிசு வழங்கி பாராட்டியது.
தமிழக அரசின் விருது பெற்ற விவசாயி முனுசாமியை தருமபுரிக்கு நேரில் வந்து சந்தித்த புதுச்சேரி வேளாண் அமைச்சர் இரா.கமலக்கண்ணன், அவருக்கு பாராட்டு தெரிவித்தார்.
அப்போது அவர் செய்தியாளர்களிடம் கூறியது: தருமபுரி விவசாயி நெல் சாகுபடியில் சாதனை படைத்துள்ளதற்கு தமிழக அரசு விருது வழங்கியுள்ளது. எனவே, இவரை நேரில் சந்தித்து வாழ்த்து தெரிவித்தோம். மேலும், அவர் சாகுபடியில் பயன்படுத்திய தொழில்நுட்ப முறைகளைக் கேட்டறிந்துள்ளோம். அவரின் அனுபவத்தையும், கடைப்பிடித்த முறைகள் குறித்தும் புதுச்சேரி மாநில விவசாயிகளுக்கு பரிந்துரைக்க உள்ளோம். மேலும், காவிரி விவகாரத்தில் புதுச்சேரி மாநிலத்துக்குரிய பங்களிப்பு தண்ணீரை ஆணையம் மூலம் பெறுவோம். இதில் சமரசம் அடைய மாட்டோம் என்றார்.