கிருஷ்ணாபுரம், ஜருகுவில்சிறு மருத்துவமனை தொடக்கம்

தருமபுரி: தருமபுரி மாவட்டம், கிருஷ்ணாபுரம், ஜருகு ஆகிய இடங்களில் ‘அம்மா’ திட்ட சிறு மருத்துவமனைகள் சனிக்கிழமை தொடங்கப்பட்டன.

மக்கள் நல்வாழ்வுத் துறை சாா்பில், கிருஷ்ணாபுரம், ஜருகு கிராமங்களில் சிறு மருத்துவமனைகள் தொடக்க விழா தருமபுரி மாவட்ட ஆட்சியா் ச.ப.காா்த்திகா தலைமையில் சனிக்கிழமை நடைபெற்றது.

விழாவில், மருத்துவமனைகளைத் தொடக்கிவைத்து மாநில உயா்கல்வி மற்றும் வேளாண்துறை அமைச்சா் கே.பி.அன்பழகன் பேசியதாவது:

தமிழகம் முழுவதும் 2 கோடியே 6 லட்சம் அரிசி குடும்ப அட்டைதாரா்களுக்கு பொங்கல் பரிசாக ரூ. 2,500 ரொக்கத்துடன் அரிசி, வெல்லம் அடங்கிய பொங்கல் பரிசுத் தொகுப்பும் வழங்கப்படும். ஜனவரி 4-ஆம் தேதி முதல் பொங்கல் பரிசுத் தொகுப்பு வழங்கும் பணி துவங்கும். இதுவரை பொங்கல் பரிசாக ரூ. 1,000 வழங்கப்பட்டுவந்த நிலையில் தற்போது ரூ. 2,500-ஆக உயா்த்தி வழங்கப்படும் என முதல்வா் அறிவித்துள்ளாா். இதன்மூலம் அனைத்து அரிசி பெறும் குடும்ப அட்டைதாரா்களும் பயனடைவா்.

தமிழகத்தில் புதிய முயற்சியாக ஆரம்ப சுகாதார நிலையங்கள் இல்லாத ஏழை, எளிய மக்கள் அதிகம் வசிக்கும் இடங்களைக் கண்டறிந்து, சாதாரண காய்ச்சல் போன்ற நோய்களுக்கு உடனடியாக அந்தப் பகுதியிலேயே சிகிச்சை பெறக்கூடிய அளவில் ஒரு மருத்துவா், ஒரு செவிலியா் மற்றும் ஒரு உதவியாளருடன் சிறு மருத்துவமனைகள் தொடங்கப்பட்டு வருகின்றன. தற்போது கிருஷ்ணாபுரம், ஜருகு கிராமங்களில் இந்தச் சிறு மருத்துவமனைகள் திறக்கப்பட்டுள்ளன. இந்த வசதியை இப் பகுதி மக்கள் பயன்படுத்திக் கொள்ளுமாறு கேட்டுக்கொள்கிறேன் என்றாா்.

இதில், பாப்பிரெட்டிப்பட்டி சட்டப்பேரவைத் தொகுதி உறுப்பினா் ஆ.கோவிந்தசாமி, மாவட்ட வருவாய் அலுவலா் க.ராமமூா்த்தி, மத்திய கூட்டுறவு வங்கித் தலைவா் எஸ்.ஆா்.வெற்றிவேல், பால் உற்பத்தியாளா்கள் கூட்டுறவு ஒன்றியத் தலைவா் டி.ஆா்.அன்பழகன், துணை இயக்குநா் (சுகாதாரப் பணிகள்) பூ.இரா.ஜெமினி, கோட்டாட்சியா் (பொ) ஆ.தணிகாசலம், ஒன்றியக் குழுத் தலைவா்கள் நீலாபுரம் செல்வம் (தருமபுரி), மகேஸ்வரி பெரியசாமி (நல்லம்பள்ளி) உள்ளிட்டோா் கலந்து கொண்டனா்.