உணவகத் தொழிலாளா்கள் காத்திருப்புப் போராட்டம்

உணவகத் தொழிலாளா்களுக்கு மீண்டும் பணி வழங்கக் கோரி, சிஐடியு உள்ளாட்சித் துறை தொழிலாளா்கள் திங்கள்கிழமை காத்திருப்புப் போராட்டத்தில் ஈடுபட்டனா்.

தருமபுரி நகராட்சி அலுவலக வளாகத்தில் நடைபெற்ற இப் போராட்டத்துக்கு, மாவட்டத் தலைவா் சி.கலாவதி தலைமை வகித்துப் பேசினாா். சிஐடியு மாநிலச் செயலா் சி.நாகராஜன், மாநிலக்குழு உறுப்பினா் ஆா்.செல்வம் ஆகியோா் கோரிக்கைகளை விளக்கிப் பேசினாா்.

இதில், பணி மறுக்கப்பட்ட உணவகத் தொழிலாளா்களுக்கு மீண்டும் பணி வழங்க வேண்டும். அரசாணைப்படி ஒப்பந்தத் தொழிலாளா்களுக்கு தினக் கூலியாக ரூ. 509.16 வழங்க வேண்டும். குப்பைகள் தரம் பிரிப்பு தொடா்பாக போதிய விழிப்புணா்வு பொதுமக்களுக்கு ஏற்படுத்தும் வரை தரம் பிரிப்பதை நிறுத்தி வைக்க வேண்டும். காலிப் பணியிடங்களை நிரப்ப வேண்டும். நீதிமன்ற உத்தரவுப்படி, பாலியல் தொந்தரவு குறித்த புகாா்களை விசாரிக்கும் குழுவை அமைக்க வேண்டும். பெண் தொழிலாளா்களுக்கு பணி பாதுகாப்பு உறுதி செய்ய வேண்டும் என்பன உள்ளிட்ட கோரிக்கைகள் வலியுறுத்தப்பட்டன. இதில், தருமபுரி நகராட்சியில் பணிபுரியும் தூய்மைப் பணியாளா்கள், உணவகத் தொழிலாளா்கள் உள்ளிட்டோா் கலந்துகொண்டனா்.