"போச்சம்பள்ளி சுற்று வட்டாரத்தை வறட்சி பகுதியாக அறிவிக்க வேண்டும்'

போச்சம்பள்ளி மற்றும் அதன் சுற்றுவட்டாரப் பகுதிகளை வறட்சியால் பாதித்த பகுதியாக அறிவிக்க வேண்டும் என  பர்கூர் வட்டார காங்கிரஸ் தலைவர் விவேகானந்தன் கேட்டுக் கொண்டார்.
இதுகுறித்து அவர் வெளியிட்ட அறிக்கையில், போச்சம்பள்ளி மற்றும் அதன் சுற்றுவட்டார கிராமங்களில் உள்ள விளைநிலங்களில் ஆண்டுதோறும் பருவ மழையை நம்பி துவரை, மக்காச்சோளம், மா, பச்சைப் பயிறு, கொள்ளு, கேழ்வரகு நிலக்கடலை சாகுபடி செய்வது வழக்கம். கடந்த சில ஆண்டுகளாக போதிய மழை பெய்யாததால், போச்சம்பள்ளி, சுற்று வட்டாரப் பகுதி கடும் வறட்சி
நிலவியது. 
இதனால் விவசாயிகள் பயிர்வகை மற்றும் அனைத்து வகையான விவசாயமும் செய்ய முடியாமல் தவித்து வந்தனர்.
பசுந்தீவனம் இல்லாததால் தாங்கள் வளர்த்து வந்த பசுமாடு, காளை மாடுகளை விற்பனை செய்து வந்தனர். இந்நிலையில் கடந்த சில தினங்களுக்கு முன் மழை பெய்ததால் விவசாயிகள் தங்களது விளைநிலங்களை உழுது நிலக்கடலை, சோளம், கம்பு, மக்காச்சோளம், கத்திரி, மிளகாய், பாகற்காய், அவரை போன்ற பயிர் வகைகள் பயிரிட்டுள்ளனர். ஆனாலும் பருவ மழை பெய்யாததால் டிராக்டர்களில் தண்ணீர் விலைக்கு வாங்கி பயிர்களுக்கு தண்ணீர் பாய்ச்சுகின்றனர்.
எனவே, போச்சம்பள்ளி தாலுகாவை வறட்சியால் பாதித்த பகுதி என்று அறிவித்து, பாதிப்படைந்த விவசாயிகளுக்கு உரிய இழப்பீடு வழங்க வேண்டுமென அதில் தெரிவித்துள்ளார்.