பரமத்தி வேலூர் ஏலச் சந்தையில் வாழைத்தார்களின் விலை உயர்வு

பரமத்தி வேலூர் ஏலச் சந்தையில் ஆடி 18 பண்டிகையை முன்னிட்டு வாழைத்தார்களின் விலை உயர்வடைந்துள்ளதால், வாழை பயிர் செய்துள்ள விவசாயிகள் மகிழ்ச்சி அடைந்துள்ளனர்.
பரமத்தி வேலூர் காவிரி கரையோரப் பகுதிகளில் பல்லாயிரக்கணக்கான ஏக்கரில் வாழை பயிர் செய்யப்பட்டுள்ளது. இங்கு விளையும் வாழைத்தார்கள் கேரளம், கர்நாடகம், ஆந்திரம் உள்ளிட்ட பல்வேறு மாநிலங்களுக்கும், சேலம், கோவை, ஈரோடு, கரூர், திண்டுக்கல் உள்ளிட்ட பல்வேறு மாவட்டங்களுக்கும் தினந்தோறும் லாரிகள் மூலம் அனுப்பப்பட்டு வருகின்றன.
மேலும், சிறு விவசாயிகள் பரமத்தி வேலூர் வாழைத்தார் சந்தைக்கு விளைந்த தங்களது வாழைத்தார்களை நேரடியாக கொண்டுவந்து விற்பனை செய்து வருகின்றனர்.
கடந்த வாரம் நடைபெற்ற ஏலத்துக்கு 500 வாழைத்தார்கள் கொண்டு வரப்பட்டிருந்தன. இதில் பூவன் அதிகபட்சமாக ரூ.100 வரை விற்பனையானது. ரஸ்தாளி அதிகபட்சமாக ரூ.200-க்கும், பச்சைலாடன் அதிகபட்சமாக ரூ.250-க்கும், கற்பூரவள்ளி ரூ.250-க்கும் ஏலம் போனது. மொந்தன் வாழைக்காய் ஒன்று ரூ.7-க்கு விற்பனையானது.
புதன்கிழமை 1,500 வாழைத்தார்கள் ஏலத்துக்கு கொண்டு வரப்பட்டிருந்தன. இதில் பூவன் அதிகபட்சமாக ரூ.300 வரையிலும், ரஸ்தாளி அதிகபட்சமாக ரூ.350-க்கும், பச்சைலாடன் அதிகபட்சமாக ரூ.350-க்கும், கற்பூரவள்ளி ரூ.400-க்கும் ஏலம் போனது. மொந்தன் வாழைக்காய் ஒன்று ரூ.10-க்கு விற்பனையானது. ஆடி 18 பண்டிகையை முன்னிட்டு வாழைத்தார்களின் விலை உயர்வடைந்துள்ளதால் வாழை பயிர் செய்துள்ள விவசாயிகள் மகிழ்ச்சி அடைந்துள்ளனர்.