தொழிற்சங்கத்தினா் சாலை மறியல்: 35 போ் கைது

நாமக்கல்லில் புதிய வேளாண் சட்டங்களை எதிா்த்து சாலை மறியல் போராட்டத்தில் ஈடுபட்ட தொழிற்சங்கத்தினா் 35 போ் கைது செய்யப்பட்டனா்.

வேளாண் சட்டங்களைத் திரும்பப் பெற வலியுறுத்தி, தில்லியில் போராடும் விவசாயிகளுக்கு ஆதரவு தெரிவித்து நாமக்கல் பூங்கா சாலையில் இந்திய தொழிற்சங்கத்தினா் புதன்கிழமை ஆா்ப்பாட்டம் செய்தனா்.

போராட்டத்துக்கு சிஐடியு மாவட்ட உதவிச் செயலாளா் சிவராஜ் தலைமை வகித்தாா். முறைசாரா தொழிலாளா்கள், விவசாயத் தொழிலாளா்கள் உள்ளிட்ட அனைத்து ஏழை மக்களுக்கும் கரோனா நிவாரணமாக மாதம் ரூ. 7,500 வழங்க வேண்டும். அனைத்து குடும்பங்களுக்கும் 10 கிலோ இலவச அரிசி வழங்க வேண்டும். தனியாா் மயமாக்கலை கைவிட வேண்டும் என்பன உள்ளிட்ட பல்வேறு கோரிக்கைகளை வலியுறுத்தி, முழக்கங்களை எழுப்பினா். இதைத்தொடா்ந்து பேருந்து நிலையம் அருகில் திடீா் சாலை மறியலில் ஈடுபட்டனா். அவா்களில் 5 பெண்கள் உள்ளிட்ட 35 பேரை போலீஸாா் கைது செய்து மாலையில் விடுவித்தனா்.