பெண் வட்டாட்சியரிடம் நகை பறிப்பு: இளைஞருக்கு 7 ஆண்டு சிறை

சேலத்தில் பெண் வட்டாட்சியரிடம் நகையைப் பறித்த வழக்கில் இளைஞருக்கு 7 ஆண்டுகள் சிறை தண்டனை விதிக்கப்பட்டுள்ளது.
சேலம் பெரியபுதூர் ராஜாராம் நகரைச் சேர்ந்தவர் சாந்தி (56). இவர், தேசிய நெடுஞ்சாலை துறையில் வட்டாட்சியராகப் பணிபுரிந்து வருகிறார். இவர், கடந்த 2013 செப்டம்பர் 28-ஆம் தேதி தனது மகளுடன் கோரிமேடு நோக்கிச் சென்று கொண்டிருந்தார்.
அப்போது இருசக்கர வாகனத்தில் வந்த 2 பேர் திடீரென சாந்தியை வழிமறித்து அவர் அணிந்திருந்த இரண்டே முக்கால் பவுன் தங்க நகையைப் பறித்துச் சென்றனர். 
இதுதொடர்பாக அஸ்தம்பட்டி போலீஸார் வழக்குப் பதிவு செய்து  விசாரித்து வந்தனர். இதில் 2014 இல் சென்னை முகப்பேரைச் சேர்ந்த நிர்மல் (32), தேனி பெரியகுளம் அல்லிநகரைச் சேர்ந்த முருகன் (32) ஆகியோரை கைது செய்தனர்.
இதனிடையே அஸ்தம்பட்டி காவல் நிலைய ஆய்வாளராக இருந்த கண்ணன், வழக்கு விசாரணையில் குற்றப்பத்திரிகை தாக்கல் செய்து, வழக்கின் சாட்சிகளை நீதிமன்றத்தில் ஆஜர்படுத்தினர். அரசு தரப்பில் அரசு வழக்குரைஞர் காந்திமதி ஆஜராகி வாதாடினார். இந்த வழக்கை விசாரித்த மகளிர் நீதிமன்ற நீதிபதி விஜயகுமாரி, வழக்கின் இரண்டாவது முக்கிய நபரான முருகனுக்கு 7 ஆண்டு சிறை தண்டனை விதித்து தீர்ப்பளித்தார்.
இதனிடையே வழிப்பறி வழக்கில் தொடர்புடைய நபருக்கு 7 ஆண்டுகள் சிறை தண்டனை பெற்று தந்த ஆய்வாளர்  கண்ணனை, மாநகர காவல் ஆணையர் கே. சங்கர் பாராட்டினார்.