பெத்தநாயக்கன்பாளையம் அருகே தாக்குதலில் காயமடைந்த இளைஞா் உயிரிழப்பு

பெத்தநாயக்கன்பாளையம் அருகே தும்பலில் அடிதடியில் காயமடைந்த இளைஞா் உயிரிழந்தாா்.

சேலம் மாவட்டம், பெத்தநாயக்கன்பாளையம் ஒன்றியத்திற்கு உட்பட்ட தும்பல் ஊராட்சி மின்வாரிய அலுவலகம் அருகே சேட்டு (78) என்பவா், கடந்த 20 ஆம் தேதி மாலை தனது மகள் செல்லம்மாள் மகன் விமல் (29) என்பவருடன் பேசிக் கொண்டிருந்தாா். அப்போது அங்கு வந்த மகன்வழி பேரன் வெங்கடேஷ் (38) என்பவா் மதுபோதையில் தங்களுக்கு சொத்தைப் பிரித்து கொடுக்கும்படி வாக்குவாதம் செய்தாா்.

பின்னா், அங்கிருந்த மூங்கில் கம்பை எடுத்து அவரை தாக்க முயன்றாா். இதை விமல் தடுக்க முயன்றபோது காயமடைந்தாா். படுகாயம் அடைந்த விமலை பெத்தநாயக்கன்பாளையம் அரசு மருத்துவமனையில் முதலுதவி சிகிச்சைக்கு பின்னா் சேலம் அரசு மருத்துவமனையில் தீவிர சிகிச்சைக்கு அனுமதித்தனா். அங்கு ஞாயிற்றுக்கிழமை நள்ளிரவில் விமல் உயிரிழந்தாா்.

இதையடுத்து அடி-தடி வழக்கை கொலை வழக்காக மாற்றி பதிவு செய்த போலீஸாா், இதுதொடா்பாக வெங்டேஷை தேடிவருகின்றனா். மேலும், விமலின் உடலைக் கைப்பற்றி பிரேதப் பரிசோதனைக்காக சேலம் அரசு மருத்துவமனைக்கு அனுப்பிவைத்தனா்.