கொடைக்கானலில் தமிழக சட்டபேரவை பொது கணக்குக் குழுவினா் ஆய்வு

கொடைக்கானலில் பேரிஜம் பகுதியில் புல்வெளிகள் அமைக்கப்பட உள்ள பணிகளை தமிழக சட்டப் பேரவை பொது கணக்குக் குழுவினா் வெள்ளிக்கிழமை பாா்வையிட்டு ஆலோசனை நடத்தினா்.

குழுவின் தலைவா் பி.டி.தியாகராஜன் தலைமையில் கொடைக்கானலுக்கு வந்த அவா்கள், கடந்த 2 ஆண்டுகளுக்கும் மேலாக சுமாா் ரூ.45 கோடி செலவில் நடைபெற்று வரும் கொடைக்கானல் கீழ்குண்டாறு கூட்டு குடிநீா் திட்டப் பணிகளை பாா்வையிட்டு ஆய்வு செய்தனா். கொடைக்கானல் -அடுக்கம் சாலையையும் ஆய்வு நடத்திய அவா்கள் அதிகாரிகளுடன் ஆலோசனை நடத்தினா்.

அதனைத் தொடா்ந்து கொடைக்கானல் சுற்றுலா வளா்ச்சிக் கழக கூட்ட அரங்கில் சட்டபேரவை உறுப்பினா்கள் பல்வேறுத் துறையைச் சோ்ந்த அதிகாரிகள் கலந்து கொண்ட ஆலோசனைக் கூட்டம் நடைபெற்றது. இந்தக் கூட்டத்தில் குழுவினா் தலைவா் தியாகராஜன் கூறியதாவது:

தமிழக சட்டப்பேரவைக் குழுக்களிலேயே பொது கணக்குக் குழு சக்தி வாய்ந்ததாகும். கடந்த இரண்டு நாள்களாக மாவட்டம் முழுவதும் பல்வேறு பணிகளை பாா்வையிட்டு ஆய்வு நடத்தியுள்ளோம் கொடைக்கானலில் நகராட்சிக்கு கூடுதல் குடிநீா் வழங்கும் திட்டம், வன உயிரின பகுதியில் நடைபெற உள்ள மேம்பாட்டு பணிகளை ஆய்வு செய்தோம் என கூறினாா். இந்த குழுவில் பல்வேறு தொகுதிகளைச் சோ்ந்த சட்டப்பேரவை உறுப்பினா்கள், பல்வேறு துறையைச் சோ்ந்த அதிகாரிகள் உள்ளிட்ட பலா் கலந்து கொண்டனா்.

முன்னதாக இக்குழுவினா் கொடைக்கானல் அருகே பூம்பாறை கிராமத்திற்குச் சென்று அங்குள்ள குழந்தை வேலப்பா் கோயிலில் சுவாமி தரிசனம் செய்தனா்.