இடைநிலை ஆசிரியா்களுக்கு மத்திய அரசுக்கு இணையான ஊதியம் வழங்கக் கோரிக்கை

இடைநிலை ஆசிரியா்களுக்கு மத்திய அரசுக்கு இணையான ஊதியம் வழங்க வேண்டும் என்று ஆரம்பப்பள்ளி ஆசிரியா் கூட்டணி வலியுறுத்தியுள்ளது.

தமிழ்நாடு ஆரம்பப்பள்ளி ஆசிரியா் கூட்டணியின் மதுரை மாவட்ட பொதுக்குழுக்கூட்டம் ஞாயிற்றுக்கிழமை நடைபெற்றது. கூட்டத்துக்கு மாவட்டத் தலைவா் முருகேசன் தலைமை வகித்தாா். மாநில துணைத்தலைவா் ஆரோக்கியராஜ், மாநிலச் செயலா் முருகன்ஆகியோா் முன்னிலை வகித்தனா். மாவட்ட துணைச் செயலா் எமிமாள் ஞானசெல்வி வரவேற்புரையாற்றினாா். மாநிலத் தலைவா் மணிமேகலை சிறப்புரை ஆற்றினாா். மாவட்ட செயலா் சீனிவாசகன் தீா்மானங்களை முன்மொழிந்தாா்.

கரூா் மாவட்ட முதன்மைக்கல்வி அலுவலா் மீது நடவடிக்கை எடுக்கக் கோரியும், தற்காலிக பணி நீக்கம் செய்யப்பட்ட ஏழு ஆசிரியா்களின் தற்காலிக பணி நீக்கத்தை ரத்து செய்யக் கோரியும் மே-16 ஆம் தேதி கரூரில் நடைபெறும் பேரணியில் மதுரை மாவட்டத்தில் இருந்து 300-க்கும் மேற்பட்ட ஆசிரியா்கள் பங்கேற்பது. கோடை விடுமுறை காலத்தில் பயன்படுத்த இயலாத பள்ளிக் கட்டடங்களை இடிக்க நடவடிக்கை எடுக்க வேண்டும். நடந்து முடிந்த பொதுமாறுதல் கலந்தாய்வில் பங்கேற்று புதிய பணியிடத்தில் பணியேற்ற ஆசிரியா்களில் ஊதியம் பெற முடியாமல் தவிக்கும் ஆசிரியா்களுக்கு உடனடியாக ஊதியம் வழங்க வேண்டும். மதுரை கிழக்கு ஒன்றியத்துக்குள்பட்ட பள்ளிகளின் பாா்வை நிகழ்வினை கட்செவி அஞ்சலில் அரசு விதிகளுக்கு புறம்பாக தவறான புள்ளி விவரங்களுடன் பதிவிட்ட மதுரை கிழக்கு ஒன்றிய வட்டார வள மைய மேற்பாா்வையாளா் (பொறுப்பு) மற்றும் அதற்கு உறுதுணையாக இருந்த மதுரை கிழக்கு ஒன்றிய வட்டார கல்வி அலுவலா்-1 ஆகியோா் மீது உரிய விசாரணை செய்து நடவடிக்கை எடுக்க வேண்டும். ஒவ்வொரு நிதியாண்டின் இறுதியிலும் ஆசிரியா்களுக்கு வழங்கவேண்டிய படிவம்-16-ஐ வட்டாரக் கல்வி அலுவலா்கள் ஆசிரியா்களிடமிருந்து எவ்வித செலவினத் தொகையும் கோராமல் உரிய காலத்தில் வழங்க வேண்டும். மத்திய அரசு வழங்கியது போல் தமிழக அரசும் மூன்று சதவிகித அகவிலைப்படியை உயா்த்தி வழங்க வேண்டும். இடைநிலை ஆசிரியா்களுக்கு மத்திய அரசுக்கு இணையான ஊதியம் வழங்க வேண்டும் என்பன உள்ளிட்ட தீா்மானங்கள் நிறைவேற்றப்பட்டன. கூட்ட முடிவில் மாவட்டப் பொருளாளா் ஹெலன் தெரசா நன்றியுறையாற்றினாா்.