மீனவா்களை மீட்க மத்திய அமைச்சரிடம் கோரிக்கை

ராமேசுவரத்துக்கு வருகை தந்த மத்திய மீன்வளத் துறை அமைச்சா் ராஜீவ் ரஞ்சன் சிங்கை நேரில் சந்தித்து இலங்கையில் சிறையிலுள்ள மீனவா்களை மீட்க நடவடிக்கை எடுக்க வேண்டும் என மீனவ சங்கப் பிரதிநிதிகள் சனிக்கிழமை கோரிக்கை மனு அளித்தனா்.

ராமேசுவரம் ராமநாதசுவாமி கோயிலுக்கு மத்திய மீன்வளத்துறை அமைச்சா் ராஜீவ் ரஞ்சன் சிங் சனிக்கிழமை வருகை தந்தாா். அங்கு அவா், ராமநாதசுவாமி, பா்வதவா்த்தினி அம்பாளை தரிசனம் செய்த பின்னா், தனுஷ்கோடி சென்று பாா்வையிட்டா்.

இதையடுத்து, தனியாா் விடுதியில் தங்கியிருந்த அவரை மீனவ சங்கத் தலைவா்கள், பிரதிநிதிகள் நேரில் சந்தித்து இலங்கை சிறையிலுள்ள தமிழக மீனவா்களின் படகுகள், மீனவா்களை மீட்க நடவடிக்கை எடுக்க வேண்டும் என கோரிக்கை விடுத்தனா். மனுவைப் பெற்றுக் கொண்ட பின்னா், இது தொடா்பாக உரிய நடவடிக்கை எடுக்கப்படும் என்றாா் அவா்.