சிறந்த மாதிரிப் பள்ளியாக அல்லிநகரம் அரசுப் பள்ளி தேர்வு

தேனி மாவட்டத்தில் சிறந்த மாதிரி பள்ளியாக அல்லிநகரம் அரசு மேல்நிலைப் பள்ளியை அரசு தேர்வு செய்துள்ளது.
அல்லிநகரம் அரசு மேல்நிலைப் பள்ளி கடந்த 1985-ம் ஆண்டு நடுநிலைப் பள்ளியாக தொடங்கப்பட்டு, மேல்நிலைப் பள்ளியாக நிலை உயர்த்தப்பட்டுள்ளது. இந்தப் பள்ளியில் தற்போது மொத்தம் 1,067 மாணவ, மாணவிகள் படித்து வருகின்றனர். பள்ளிக் கல்வித் துறை சார்பில் மாவட்ட அளவில் சில்வார்பட்டி அரசு மேல்நிலைப் பள்ளி, அல்லிநகரம் அரசு மேல்நிலைப் பள்ளி ஆகியவை சிறந்த பள்ளிகளாக தேர்வு செய்யப்பட்டு அரசுக்கு பரிந்துரை செய்யப்பட்டது.
இந்த நிலையில், அல்லிநகரம் அரசு மேல்நிலைப் பள்ளியை மாவட்ட அளவில் சிறந்த மாதிரி பள்ளியாக அரசு தேர்வு  செய்து அறிவித்துள்ளது என்றும், இதற்காக அரசு சார்பில் அல்லிநகரம் அரசு மேல்நிலைப் பள்ளிக்கு பாராட்டுச் சான்றிதழ் மற்றும் ரூ.50 லட்சம் பரிசுத் தொகை வழங்கப்பட உள்ளது என்றும் மாவட்ட பள்ளிக் கல்வித்துறை அலுவலர்கள் தெரிவித்தனர்.