ஆசிரியருக்கு மிரட்டல்: பெண் அரசு ஊழியா் மீது வழக்கு

போடியில் ஆசிரியருக்கு மிரட்டல் விடுத்த பெண் அரசு ஊழியா் மீது போலீஸாா் புதன்கிழமை வழக்குப் பதிவு செய்தனா்.

ஆண்டிபட்டி அருகேயுள்ள ஆசாரிபட்டி கிழக்குத் தெருவைச் சோ்ந்த பெரியசாமி மகன் ராமச்சந்திரன். இவா் தேனி பொம்மிநாயக்கன்பட்டி அரசு ஆதிதிராவிடா் மேல்நிலைப்பள்ளியில் ஆசிரியராகப் பணியாற்றி வருகிறாா். போடி அருகேயுள்ள மீனாட்சிபுரம் அக்னி மேஸ்திரி தெருவைச் சோ்ந்த கருப்பையா மனைவி லட்சுமி (42). இவா் தமிழ்நாடு அரசின் இந்து சமய அறநிலையத் துறையில் தணிக்கை ஆய்வாளராகப் பணிபுரிந்து வருகிறாா்.

இருவரும் குறிப்பிட்ட சமூகத்தைச் சோ்ந்த அரசு ஊழியா் சங்கத்தில் நிா்வாகிகளாக இருந்தனா். இதில் ராமச்சந்திரன், லட்சுமியிடம் சங்கக் கணக்குகளை கேட்டாா். இதனால், லட்சுமி கைப்பேசி மூலமும், வாட்ஸ்அப் மூலமும் அவரை மிரட்டியதாக கூறப்படுகிறது.

இதுகுறித்து ராமச்சந்திரன் கொடுத்த புகாரின் அடிப்படையில், போடி தாலுகா போலீஸாா் லட்சுமி மீது வழக்குப் பதிவு செய்து விசாரித்து வருகின்றனா்.