திருத்தங்கல் பெருமாள் கோயில் தீர்த்தக் குளத்தில் கழிவுநீர் கலப்பது தடுப்பு

தினமணி செய்தி எதிரொலியாக, திருத்தங்கல் ஸ்ரீ நின்ற நாராயணப் பெருமாள் கோயில் தீர்த்தக் குளத்தில் கழிவுநீர் கலப்பது தடுக்கப்பட்டுள்ளது.
      திருக்கோயில் நுழைவுவாயில் அருகே அக்ரஹாரம் சாலையிலிருந்து கோயிலில் அமைந்துள்ள பாபநாச தீர்த்தத்துக்கு பாதை அமைக்கப்பட்டது. இந்தப் பாதையைப் பயன்படுத்தி, இரவு நேரங்களில் தீர்த்தக் குளத்தில் சிறுநீர் கழிப்பது உள்ளிட்ட அசுத்தம் செய்யப்பட்டு வந்ததால், கோயில் நிர்வாகம் 10 ஆண்டுகளுக்கு முன்னரே தீர்த்தக் குளத்துக்கு செல்லும் பாதையை ஒருபுறம் அடைத்து சுவர் எழுப்பியது.
     ஏற்கெனவே இருபுறமும் சுவர் உள்ளதால், இந்தப் பகுதி ஒரு அறைபோல் அமைந்துவிட்டது. பாதை அடைக்கப்பட்டாலும், அதன் கதவு மூடப்பட வில்லை. இதனால்,  அந்த இடம் சிறுநீர் கழிப்பிடமாக மாறியது.
    அப்பகுதியில் கடை வைத்துள்ளவர்களும் இந்த இடத்தை சிறுநீர் கழிக்கப் பயன்படுத்தினர். மேலும், கழிவுகளும் கொட்டப்பட்டு வந்ததால்,  அப்பகுதியில் பொதுமக்கள் நடந்து செல்ல முடியாத அளவுக்கு துர்நாற்றம் வீசியது.  மழைக் காலங்களில் கழிவுநீர் தீர்த்தக் குளத்தில் கலந்தது.
     இந்த அறை போன்ற இடத்தை, மணவாள மாமுனிவர் அறக்கட்டளையினரும், கோயில் நிர்வாகமும் சொந்தம் கொண்டாடி வந்ததால், சுகாதாரம் கேள்விக்குறியாகியது. இந்நிலையில், கோயில் தீர்த்தக் குளத்தில் கழிவு நீர் கலப்பதைத் தடுக்க நடவடிக்கை எடுக்கவேண்டும் என, தினமணியில் கடந்த அக்டோபர் 28 ஆம் செய்தி வெளியிடப்பட்டது. அதன் எதிரொலியாக, திருத்தங்கல் செங்கமலத் தாயார் டிரஸ்ட் நிர்வாகிகள், இந்த அறையினுள் யாரும் நுழைய முடியாத வகையில் தகரத்தை வைத்து அடைத்து விட்டனர்.    இது குறித்துஅப்பகுதியைச் சேர்ந்த சங்கர் என்பவர் கூறுகையில், தினமணியில் செய்தி வெளியானதையடுத்து, திருத்தங்கல் செங்கமலத்தாயார் டிரஸ்ட் நிர்வாகிகள் சுகாதாரக் கேட்டினை ஏற்படுத்திவரும் அறையை பார்வையிட்டனர். புதன்கிழமை, அந்த அறையை உள்ளே செல்ல முடியாத வகையில் தகரத்தை வைத்து மூடிவிட்டனர். இதனால், தீர்த்தக் குளத்தில் கழிவு நீர் கலப்பது தடுக்கப்பட்டுள்ளது என்றார்.