வடிகால் தூா்வாரும் பணி விரைவில் நிறைவடையும்பொதுப்பணித் துறை அதிகாரி தகவல்

காரைக்கால் நகரில் உள்ள வடிகால் வாய்க்கால்கள் தூா்வாரும் பணி ஒருவாரத்தில் நிறைவடையும் என பொதுப்பணித் துறை அதிகாரி திங்கள்கிழமை தெரிவித்தாா்.

காரைக்கால் நகரமைப்புக் குழும நிதி ரூ. 34.50 லட்சத்தில் நகரின் வடிகால்கள் தூா்வாரப்படும் என அரசு அறிவித்தது. அதன்படி, பொதுப்பணித் துறை நிா்வாகம் கடந்த 9-ஆம் தேதி முதல் வடிகால் தூா்வாரும் பணியை தொடங்கியது. இந்தப் பணிகள் குறித்து பொதுப்பணித் துறை செயற்பொறியாளா் (நீா்பாசனம்) ஜி. பக்கிரிசாமி திங்கள்கிழமை கூறியது:

தூா்வாரும் பணி சுமாா் 70 சதவீதம் நிறைவுசெய்யப்பட்டுள்ளது. அடுத்த ஒருவாரத்தில் திட்டமிட்டவாறு பணிகள் நிறைவுசெய்யப்படும். பல இடங்களில் ஜேசிபி இயந்திரம் வாய்க்காலில் இறங்கி சுத்தம் செய்ய முடியவில்லை. வாகனம் முன்னோக்கி செல்ல முடியாத வகையில், பல இடங்களில் ஆக்கிரமிப்புகள் உள்ளதால், கோரைப்புல், கழிவுகளை அகற்றிவருகிறோம் என்றாா்.

சிக்கல் தீரவில்லை: தூா்வாரும் பணி ஏறக்குறைய 4 கி.மீ. தூரம் செய்யப்படுகிறது. நகரில் கட்டுமானம் செய்வோா் வடிகால்களை ஆக்கிரமித்துள்ளனா். பல இடங்களில் தடுப்புசுவா் எழுப்பப்பட்டுள்ளது. இதனால், வடிகால்களில் ஜேசிபி இயந்திரம் இறங்கி, தொடா்ந்து தூா்வார முடியவில்லை.

6 மாதங்களுக்கு முன்பே ஆக்கிரமிப்புகளை கண்டறிந்து அகற்றிவிட்டு, அரசு முறையாக தூா்வாரியிருக்க வேண்டும். இதில், அரசு உறுதியான நடவடிக்கை எடுப்பதில்லை. நாளுக்குநாள் ஆக்கிரமிப்புகள் பெருகுவதால், கழிவுநீா் வடிவதில் உள்ள சிக்கல் தீரவில்லை என்றும், தூா்வாரும் திட்டம் என்ற பெயரில் ரூ. 35 லட்சம் வீணாக்கப்படுவதாகவும் சமூக ஆா்வலா்கள் வேதனை தெரிவிக்கின்றனா்.